Azərbaycan, Gəncə, 22 may / Trend , müxbir V.Məmmədov/ Gəncə şəhərinin mərkəzi küçələrinin dayanacaqlarında yerləşən 8 çörək köşkü müvəqqəti olaraq qapadılıb. Bu barədə cümə axşamı Trend -a Gəncə şəhər İcra Hakimiyyəti başçısının müavini Şahmalı Cavadov məlumat verilib.
Gəncədə 1998-2003 -cü illərdə vətəndaşlara dayanacaqlarda ticarət obyektlərinin fəaliyyət göstərməsi üzrə layihələr verilib, lakin hazırda bu obyektlər müasir standartlara cavab vermədiyi üçün, onların bağlanması barədə qərar verilib.
Cavadov deyib ki, bağlanılan çörək köşkləri müasir standartlara cavab vermir və burada sanitar - gigiyenik qaydalara əməl olunmur. Onun sözlərinə görə, şəhərdə yeni dayanacaqların inşası üçün layihə və eskizlər də artıq hazırdır. O qeyd edib ki, layihədə müasirliklə yanaşı qədim Gəncənin memarlıq üslubu da qorunub saxlanılıb.
Rekonstruksiya zamanı kərpic, aqlay, şüşə kimi materiallardan istifadə olunacaq. Burada Şərq memarlıq elementi olan kümbəz də tətbiq ediləcək.
Gəncə şəhər Gigiyena və Epidemiologiya Mərkəzinin direktor müavini Hürriyyət İsmayılova isə bildirib ki, bağlanılan çörək köşkləri gigiyenik qaydalara cavab vermirdi. "Çörəklə birgə su və dönər satıldığı azmış kimi, bu köşklər kanalzasiya sistemi ilə təmin olunmayıb", İsmayılova əlavə edib.
Köşklərin fəaliyyətinə yalnız bütün qüsurlar aradan qaldırıldıqdan sonra icazə veriləcək. Gəncədə ümumiyyətlə 20-yə yaxın dayanacaqda çörək köşkü fəaliyyət gösətrir.
Gəncə paytaxt Bakıdan 365 kilometr qərbdə yerləşir.
Məqalə müəllifi ilə əlaqə ünvanı: [email protected]
