Azərbaycan,Bakı,26 may / Trend , müxbir K. Zərbalıyeva/ "Müxalifət" qəzetinin baş redaktoru Rövşən Kəbirli və redaktoru Yaşar Ağazadənin işi ilə bağlı Avropa İnsan Haqları Məhkəməsinə şikayət göndərilib.
Bu barədə Media Hüquq İnstitutu məlumat yayıb.
Müxalif mövqeli qəzetin müdafiəçiləri hesab edirlər ki, Azərbaycan Prezidentinin əmisi, millət vəkili Cəlal Əliyevin şikayəti əsasında ölkədaxili məhkəmə instansiyalarının jurnalistlərə qarşı hökmləri hüquqa zidd olub.
Cəlal Əliyev "Müxalifət" qəzetinin 24 fevral 2007-ci il tarixli sayında dərc olunmuş "A.M.A.Y.-Əliyevlər Ailəsinin ticarət nişanı" sərlövhəli məqalədən narazı qalaraq məhkəməyə müraciət edib. Millət vəkili məqalədə yer alan, Türkiyənin "Bu gün" qəzetinin 10 aprel 2006-cı il tarixli sayında dərc edilmiş yazıdan götürülmüş "Heydər Əliyevin dönəmində Azərbaycanın ən gəlirli sahələrinin və rüşvət çarxının başında duran Cəlal Əliyevin..." ifadəsinin onun şərəf və ləyaqətini təhqir olunduğunu iddia edib. O, məhkəmədən Rovşən Kəbirlinin və Yaşar Ağazadənin Cinayət Məcəlləsinin 147.1 və 147.2-ci maddələri ilə həbs olunmasını tələb edib.
Müdafiəçiləri hesab edir ki, ölkə məhkəmələri Kəbirli və Ağazadənin həbs edilməsini tələb edən millət vəkilinin şikayəti üzrə hökm çıxararkən, Cinayət Məcəlləsinin söz azadlığı ilə sıx bağlı olan 147.1 və 147.2-ci maddələrini yanlış şərh ediblər. Bununla da məhkəmələr jurnalistlərin Avropa Konvensiyasında təsbit olunmuş ifadə azadlığına (Maddə 10) və ədalətli məhkəmə araşdırması hüququna (Maddə 6) müdaxilə ediblər.
Müdafiəçilər Avropa Məhkəməsindən ərizəçilərin həmin hüquqlarının pozuntusunun tanınmasını,onların işlə bağlı çəkdikləri xərclərin və zərərlərin əvəzinin ödənilməsinin təmin olunmasını xahiş ediblər.
BakınınYasamal məhkəməsinin 16 may 2007-ci il tarixli hökmü ilə Kəbirli və Ağazadə 2 il 6 ay müddətinə azadlıqdan məhrum edilib. 7 ay 14 gün həbsdə saxlanılan jurnalistlər Azərbaycan prezidentinin əfv fərmanı ilə 29 dekabr 2007-ci il tarixdə azadlığa buraxılıblar.
Müəlliflə əlaqə saxlamaq üçün elektron ünvan - [email protected]
