Azərbaycan, Bakı, 20 iyun/ Trend , müxbir C.Babayeva/ Dünya Azərbaycanlıları Konqresinin (DAK) növbədənkənar X Birlik qurultayının gündəliyi açıqlanıb. Birlik qurultayı DAK və Demokratik Dünya Azərbaycanlıları Konqresi (DDAK) arasında 2007-ci ilin dekabrında imzalanmış sazişə uyğun olaraq, iyunun 21-23 -də Belçikanın paytaxtı Brüssel şəhərində, Avropa Parlamentinin iqamətgahında keçiriləcək. Bu barədə Trend - a cümə günü DAK-ın mətbuat xidmətindən məlumat verilib.
Trend -un arayışı: DAK daxilində yaranmış narazılıqlar nəticəsində, İdarə Heyəti (İH) iki yerə bölünüb. İH-nin 16 nəfər üzvdən 11-i Sabir Rüstəmxanlını DAK-ın sədri seçib. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyir və iyunun 21-23-də Brüsseldə Avropa Parlamentində qurultay keçirəcəklər. İyunun 6 -8 -də Almaniyanın K.ln şəhərində keçirilmiş, Sabir Rüstəmxanlının sədrlik etdiyi DAK-ın qurultayında 25 ölkədən 300-dək nümayəndə və qonaq iştirak edib. Qurultayda DAK-ın Nizamnaməsi və Məramnaməsinə dəyişikliklər qəbul olunub. DAK-da həmsədrlik institutu yaradılıb, Sabir Rüstəmxanlı və Firudin Pərvizniya DAK-ın həmsədrləri seçiliblər. Qulamrza Səbri Təbrizi Köln qurultayını qeyri-legitim hesab edib. İyunun 11-də Köln qurultayının yekunlarına həsr olunmuş mətbuat konfransında Rüstəmxanlı bəyan edib ki, bundan sonra Dünya Azərbaycanlıları Konqresi adına iddialılar məhkəmə qarşısında cavab verəcəklər.
Gündəliyə əsasən, DAK sədri Qulamrza Səbri Təbrizi, DDAK sədri Məmmədrza Xəştinin və DDAK-ın Nəzarət-Təftiş Komissiyalarının (NTK) hesabat məruzələri dinləniləcək. Yeni İdarə Heyəti, NTK üzvləri və sədr seçiləcək. Qurultayda, həmçinin, "Dağlıq Qarabağ münaqişəsi və Azərbaycan diasporunun vəzifələri" mövzusu ətrafında çıxışlar dinləniləcək və müzakirələr aparılacaq.
Məlumata əsasən, qurultayın son günü "Güney Azərbaycanın çağdaş durumu və siyasi gələcəyi" mövzusunda seminar keçiriləcək. Seminarda Azərbaycanın ictimai-siyasi xadimləri ilə yanaşı, Avropa parlamentariləri, BMT və Beynəlxalq Amnistiya Təşkilatının nümayəndələri, Avropada fəaliyyət göstərən İnsan Hüquqları təşkilatlarının təmsilçiləri, Azərbaycanşünas alimlər, KİV nümayəndəlri iştirak edəcəklər.
Məqalə müəllifi ilə əlaqə ünvanı: [email protected]
