Azərbaycan, Bakı,16 iyul / Trend , müxbir K.Zərbalıyeva/ Son 6 ayda Azərbaycan mediası 20 dəfə məhkəməyə çəkilib.
Trend -un məlumatına görə, Media Hüququ İnstitutunun bu ilin 6 ayı ilə bağlı Azərbaycan mediasının hüquqi durumunu əks etdirən hesabatında bu barədə məlumat verilir.
Hesabatda qeyd olunub ki, bu çəkişmələrin 7-də jurnalistlərin həbsi tələb olunub.
Həmçinin ötən dövr ərzində təxminən hər həftə bir jurnalist ya hədələnib, ya döyülüb, ya da basqıya məruz qalıb. Media Hüququ İnstitutunun proqram koordinatoru Xalid Ağaliyev hesabatın yekunları ilə bağlı çərşənbə günü keçirilən mətbuat konfransında bildirib ki, son illərin tendensiyası jurnalistlərə qarşı hədə-qorxu, məhkəmə çəkişmələrinin artdığını göstərir.
Belə ki, ötən 6 ayda jurnalistlərə qarşı 22 belə fakt qeydə alınıb.
"2003-cü ildən bu günə qədər əsasən tənqidçi jurnalistlərə qarşı 150-dən artıq belə fakt olub. Bunların arasında yalnız iki fakt üzrə cəzalandırma aparılıb. Qalan hallarda isə heç bir nəticəli araşdırma aparılmayıb", - deyə Ağaliyev vurğulayıb.
Altı ayda məhkəməyə verilən iddialarla Azərbaycan mediasından istənilən təzminatın məbləği isə Azərbaycan mediasının bir ildə əldə etdiyi gəlirdən artıq - 1 milyon 212 min manat olub. Azərbaycan mediasının bir illik gəliri isə 1 milyon dollardan artıqdır.
Məqalə müəllifi ilə əlaqə ünvanı: [email protected]