Azərbaycan, Bakı,22 iyul / Trend , müxbir K.Zərbalıyeva/ Azərbaycan Xalq Cəbhəsi Partiyasının sədrinin barəsindəki cinayət işinin xitam olunmasıilə bağlı şikayəti təmin olunmayıb.
Çərşənbə axşamı Bakı Apellyasiya Məhkəməsində Əli Kərimlinin Nəsimi rayon məhkəməsinin qərarının ləğvi ilə bağlı apellyasiya şikayətinə baxılıb.
2006 - cı ildə köhnə pasportunun müddəti bitdikdən sonra Kərimli yeni pasport almaq üçün DİN Pasport Qeydiyyatı İdarəsinə müraciət edəndə ona bildirilib ki, haqqında Nəsimi rayon prokurorluğunda 1994 -cü ildə Cinayət Məcəlləsinin qanunsuz silah-sursat saxlama maddəsilə açılan cinayət işinə xitam verilmədiyindən ona pasport verilə bilməz.
Cinayət-prosessual qanunvericiliyə görə, beş il müddətinə xitam verilməli olan bu cinayət işi 12 ildir açıq qalıb. Nəsimi rayon məhkəməsi Kərimlinin şikayətini təmin etməmişdi.
Bu qərardan apellyasiya şikayəti verilmişdi və Apellyasiya Məhkəməsi Nəsimi rayon məhkəməsinin qərarını qüvvədə saxlamışdı.
Qərardan verilən kassasiya şikayətinə baxan Ali Məhkəmə, işin cinayət icraatına aid olduğunu əsas gətirərək, şikayətə mülki mühakimə qaydasında baxılmalı olmadığından, Apellyasiya Məhkəməsinin qətnaməsi ləğv etmişdi.
Ali Məhkəmənin qərarı ilə, Kərimliyə məhkəmə nəzarəti qaydasında cinayət-prosessual qanunvericiliyin tələblərinə uyğun olaraq, şikayət verə bilməsi izah olunub.
Bundan sonra Kərimli yenidən Nəsimi rayon məhkəməsinə müraciət etsə də, şikayəti təmin olunmayıb.
Müxalifət liderinin vəkili Elçin Qəmbərov Trend -a bildirib ki, Apellyasiya məhkəməsi şikayəti təmin etməyib və Nəsimi rayon məhkəməsinin qərarını qüvvədə saxlayıb.
Vəkil qərardan Ali Məhkəməyə kassasiya şikayətinin verilib-verilməyəcəyinin hələlik müəyyən olunmadığını, bu barədə Kərimli ilə məsləhətləşəcəyini deyib.
Müəlliflə əlaqə saxlamaq üçün elektron ünvan - [email protected]