Azərbaycan, Bakı, 24 iyul/ Trend , müxbir E.Babayev/ Azərbaycanda "Mətbuat Şurası haqqında" Qanunun qəbul olunması nəzərdə tutulur. "Mətbuat Şurasının qəbul etdiyi qərarların hüquqi gücə malik olması, eləcə də təsirli olması üçün belə bir Qanunun qəbuluna ciddi ehtiyac var",- cümə axşamı Trend -a Mətbuat Şurasının sədri Əflatun Amaşov bildirib.
Trend -un arayışı: Mətbuat Şurası 2003 - cü il martın 15 - də jurnalistlərin birinci qurultayında təsis olunub. Həmin vaxtdan etibarən, "Mətbuat Şurası haqqında" Qanunun qəbul edilməsi məsələsi gündəmə gətirilib. Lakin indiyədək Qanunun qəbulu baş tutmayıb.
Amaşov hesab edir ki, bu Qanunun qəbulunun zamanı yetişib. Onun sözlərinə görə, layihənin ilkin variantı 2003 - cü ildən hazırdır. "Layihənin üzərində işləmək üçün tanınmış hüquqşünaslar cəlb olunub" - deyən Amaşov bildirib ki, Qanun qəbul olunarkən ehtiyatlı olmaq lazımdır. "Elə etməliyik ki, Qanun Mətbuat Şurasının müstəqilliyini, qəbul etdiyi qərarların təsirini artırsın. Mənə elə gəlir ki, qanun layihəsinin üzərində kifayət qədər işləmək lazımdır" - deyə Şura sədri qeyd edib.
Məqalə müəllifi ilə əlaqə ünvanı: [email protected]
