Azərbaycan, Bakı, 19 avqust / Trend , müxbir K.Zərbalıyeva/ Azərbaycanda narkotiklərin qanunsuz dövriyyəsində günahlandırılan "Azadlıq" qəzetinin həbsdə olan əməkdaşı Mirzə Sakiti cəza çəkdiyi müəssisədə öldürtmək istəyiblər.
Bu barədə çərşənbə axşamı Trend -a Sakitin vəkili Əlayif Həsənov məlumat verib.
Vəkilin sözlərinə görə, bu gün Sakitlə görüşdə jurnalist deyib ki, cəza çəkdiyi 14 saylı müəssisədə məhkumlardan birinə onunla aralarında süni münaqişə yaratmaq tapşırılıb.
Həsənov bildirib ki, Sakitin həyatı və sağlamlığı üçün ciddi təhlükə var.
"Sakitə qarşı belə bir sifariş alan məhkum bir neçə məhkumun yanında bunu etiraf edib. Bundan sonra müəssisə rəhbərliyi onu karsa saldırıb", - vəkil bildirib.
Vəkilin sözlərinə görə, Penitensiar Xidmətin əməliyyat müvəkkili Emin Həsənov da bu məsələ ilə əlaqədar Sakitlə görüşüb.
Vəkil deyib ki, əməliyyat müvəkkili Sakitin həyatı üçün yaranan təhlükənin qarşısını almaq üçün onun başqa müəssisəyə köçürülməsinə yardım edəcəyinə söz verib.
Həsənov bu faktın araşdırılması üçün Penitensiar Xidmətin rəhbərliyinə və Baş Prokurorluğa müraciət edəcəyini, araşdırma başa çatanadək müəssisə rəisinin vəzifəsindən azad olunmasını tələb edəcəyini deyib.
Ədliyyə Nazirliyinin Cəzaların İcrası Müfəttişliyinin rəisi Malik Ələkbərov Trend -a vəkilin verdiyi məlumatı təkzib edib.
O bildirib ki, Emin Həsənov adlı müfəttiş tez-tez həmin müəssisədə olur və hər səfərində Sakitlə görüşür, onun problemləri ilə maraqlanır.
Rəisin sözlərinə görə, Sakit başqa müəssisəyə köçürülməsini istəyir və bu xahişlə Penitensiar Xidmətə müraciət edib. "Onun müraciətinə hazırda baxılır və əsas olarsa, Sakitin müəssisəsi dəyişdiriləcək", - deyə Ələkbərov vurğulayıb.
Rəis bu məlumatın yayılmasının da Sakitin müəssisəsinin dəyişdirilməsinə xidmət etdiyini deyib.
Ələkbərov Sakitin övladlarından birinin onunla görüşə buraxılmamasına da aydınlıq gətirib və bildirib ki, onunla görüşə gələn 3 qızından birinin sənədi olmadığından görüşə buraxılmayıb.
Penitensiar Xidmətin İctimaiyyətlə Əlaqələr Mərkəzinin rəhbəri Mehman Sadıqov vəkilin dediklərini təkzib edib və onun söylədiklərini "ağ yalan" adlandırıb.
"Müəssisədə heç bir məhkumun, o cümlədən, Mirzə Sakitin həyatı üçün heç bir təhlükə yoxdur. Məhkumların təhlükəsizliyinin təmin olunması müəssisə rəisinin borcudur", - deyə Sadıqov vurğulayıb.
Sakit 2006-cı ildə narkotiklərin qanunsuz dövriyyəsində günahlandırılaraq məhkəmənin hökmü ilə 3 il azadlıqdan məhrum edilib.
Apellyasiya və Ali Məhkəmə hökmü qüvvədə saxlayıb.
Məqalə müəllifi ilə əlaqə ünvanı: [email protected]
