Azərbaycan, Bakı, 28 avqust/ Trend , G.Əhmədova/Lononda fəaliyyət göstərən "Caspian- Xəzri" Azərbaycan məktəbi Böyük Britaniyada üçüncü Azərbaycan məktəbini açmağı planlaşdırır. Bu dəfə məktəb Şotlandiyada açılacaq. Bu barədə Trend -a məktəbin rəhbəri Simuzər Baloğlanova deyib.
"Hazırda Şotlandiyada Azərbaycan məktəbinin açılması üçün maliyyə vəsaitlərinin axtarışı davam etdirilir", - Baloğlanova bildirib.
"Caspian- Xəzri"nin rəhbərinin sözlərinə görə, Böyük Britaniyada Azərbaycan məktəblərinin açılmasında məqsəd - Britaniya azərbaycanlılarında milli mədəniyyət atmosferinin saxlanılmasıdan ibarətdir. "Məktəblər, ötən il məktəbə baş çəkmiş Misir Mərdanovun timsalında Azərbaycan Təhsil Nazirliyindən böyük yardım alır", - Baloğlanova qeyd edib.
Məktəbin planlarında yeni öyrənməyə başlayanlar üçün Azərbaycan dili kurslarının açılması da daxildir. "Azərbaycanda iş tapan və ya sadəcə olaraq, dilimiz və mədəniyyətimizlə maraqlanan çoxlu ingilis var", - o deyib.
Cari ilin aprelində açılmış ikinci Azərbaycan məktəbində Azərbaycan dili, tarix, Azərbaycanın coğrafiyası və mədəniyyəti fənləri tədris edilir. Məktəb Londonun Qərbində "Hammersmith Management College"-də yerləşir.
Bu məktəb Böyük Britaniyadakı Cənubi azərbaycanlılar Təşkilatının və "Caspian- Xəzri"Azərbaycan məktəbinin ilk birgə layihəsidir. Təşkilata maliyyə yardımını "London-Azərbaycan Cəmiyyəti"göstərir.
"Caspian-Xəzri"nin birinci məktəbi 2006-cı ilin aprelindən fəaliyyət göstərir.
