Azərbaycan, Bakı 5 noyabr / müxbir K.Zərbalıyeva/ Azərbaycanda narkotiklərin qaçaqmalçılığında ittiham olunan yüksək vəzifə tutmuş şəxslərin övladlarından ibarət mütəşəkkil dəstənin üzvlərinin cinayət işi üzrə hazırlıq iclası davam etdirilib.
Xalq artisti İlhamə Quliyevanın oğlu Orxan Nadirov, Bakı şəhərinin sabiq prokuroru Ədalət Mirsalamov və Əzizbəyov rayonunun sabiq prokuroru Rəşid Həsənovun övladları Mahir Mirsalamov ,Yalçın Həsənov və daha 11 nəfərin cinayət işi üzrə məhkəmənin hazırlıq iclasında vəkillər vəsatətlə çıxış edib.
Trend -un məlumatına görə, çərşənbə günü keçirilən iclasda təqsirləndirilən Elşən Budaqovun vəkili Gülayə İlyasova müdafiə etdiyi şəxsin barəsində başlanan cinayət işinə xitam verilməsi haqda vəsatət qaldırıb. Digər təqsirləndirilən şəxs Kəmalə Eyvazovanın vəkili Gülsarə İmanova onun xəstə olduğunu əsas gətirərək, barəsində seçilən həbs -qətimkan tədbirinin dəyişdirilməsini xahiş edib.
Bakı şəhərinin sabiq prokuroru Ədalət Mirsalamovun oğlu Mahir Mirsalamovun vəkili Nərminə Məmmədova vəsatət qaldıraraq bildirib ki, müdafiə etdiyi şəxs 1998 -ci ildən bəri müxtəlif xəstəliklərdən əziyyət çəkir. Vəkil Mirsalamovun barəsində ibtidai istintaqda təyin edilən məhkəmə -tibb ekspertizasının rəyinin natamam olduğunu əsas gətirərək, məhkəmədən kompleks məhkəmə ekspertizasının keçirilməsini xahiş edib.
Yalçın Həsənovun vəkili Ələsgər Ələsgərov isə, "ekstazi" həblərinin tərkibinin müəyyən edilməsi üçün ekspertiza təyin edilməsini istəyib.
Vəsatətlərdən sonra çıxış edən dövlət ittihamçısı Nəriman Ələkbərov vəsatətlərin əsassız olduğunu və vəsatətlərin təmin edilməməsini məhkəmədən xahiş edib.
Məhkəmə verilən vəsatətləri təmin etməyib.
Hazırlıq iclası başa çatıb və cinayət işi üzrə məhkəmə baxışının noyabrın 14 - də başlaması qərara alınıb.
Orxan Nadirov, Mahir Mirsalamlı, Yalçın Həsənov, Elşən Rüstəmov, Əli İsmayılov, Zubiyə Qulami, Vüqar Əliyev, Cavidan Əliyev, Ramin Həsənov, Kamilə Eyvazova, Elşən Budaqov, Həsən Həsənov, Mirəli Əliyev Cinayət Məcəlləsinin qaçaqmalçılıq (206 - cı), satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama (234.1 - ci ) və qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma (234.4.1 - ci) maddələri ilə ittiham olunurlar.
Təqsirləndirilən şəxslər bu ilin mayında Milli Təhlükəsizlik Nazirliyinin keçirdiyi əməliyyat nəticəsində həbs ediliblər. Onlardan narkotik vasitə olan "ekstazi" aşkar olunaraq götürülüb.
Müəlliflə əlaqə saxlamaq üçün elektron ünvan- [email protected]