Azərbaycan, Bakı, 02 dekabr / Trend , müxbir K.Zərbalıyeva/ Bakının Səbayel rayonundakı sürüşmə zonasında yerləşən evlərin köçürülməsi məsələsi yenidən gündəmə gəlib.
Dekabrın 1-dən 46, 58 saylı Mənzil İstismar İdarələrinin və Səbayel Rayon İcra Hakimiyyətinin nümayəndələrindən ibarət qrup sürüşmə zolağında yerləşən evlərin ölçülməsi və qeydiyyatı proosesinə başlayıb, - sürüşmə zonasında yerləşən Bayıl yamacında məskunlaşan sakinlər çərşənbə axşamı Trend -a bildirib.
Trend - un arayışı: Bayıl yamacında 2000 - ci il martın 6-dan 7-nə keçən sürüşmə baş verib. Hadisədən sonra ərazidəki 300-dək ailənin köçürülməsi barədə qərar qəbul edilib. 2003 - cü ilədək 140 ailə köçürülüb. Evləri köçürülən sakinlərə verilən kompensasiyanın məbləği bazar qiymətlərinə uyğun olmadığından, köçürülmə prosesi dayandırılıb, məbləğin artırılması ilə bağlı Nazirlər Kabinetinə təkliflər verilib.
Ərazidə yaşayan Nadir Muradov Trend - a bildirib ki, ərazidə iş aparan icra hakimiyyətinin nümayəndələri köçürülməyə yaxın 2-3 ayda başlanılacağını deyiblər.
"Bizə deyiblər ki, Şəhidlər Xiyabanından baxanda, bu ərazi şəhərin panoramına xələl gətirir. Ona görə də, ərazidəki evlər köçürüləcək və yerində yaşıllıq, park salınacaq,- deyə Muradov vurğulayıb.
Sakinlərin sözlərinə görə, onlara bildiriblər ki, qanuni tikilmiş evlərin hər kvadratmetrinə görə 5, qanunsuz tikilmiş evlər üçün 3 min manat kompensassiya ödəniləcək.
Səbayel Rayon İcra Hakimiyyətinin şöbə müdiri İsrafil Kərimov Trend - a bildirib ki, ərazidə rayon icra hakimiyyətinin, mənzil-kommunal təsərrüfatı xidmətinin, 46 və 58 saylı MİS nümayəndələrindən ibarət qrup inventarlaşdırmaya başlayıb. Ayın sonunadək davam edəcək proses zamanı ərazidəki mənzil fondunun vəziyyəti araşdırılacaq, evlərin, burada yaşayan əhalinin sayı, evlərin yararlılıq vəziyyəti, sahəsi müəyyən olunacaq.
Bütün məlumatlar Nazirlər Kabinetinə (NK) göndəriləcək. NK - da bu məsələ ilə bağlı yaradılmış Komissiya ərazidə yaşayan sakinlərə veriləcək kompensasiyanın məbləği ilə bağlı aidiyyatı qurumlara təkliflər verəcək.
Şöbə müdiri bildirib ki, sürüşmədən sonra həmin ərazidə yeni evlərin tikilməsinə cəhdlər edilsə də, icra hakimiyyəti həmin cəhdlərin qarşısını alıb.
Məqalə müəllifi ilə əlaqə ünvanı:[email protected]