Azərbaycan, Bakı, 11 dekabr/ Trend , müxbir K.Zərbalıyeva/Avropa İnsan Haqları Məhkəməsi dekabrın 11-də Azərbaycan vətəndaşı Lətifə Əfəndiyevanın şikayəti ilə bağlı qərarını açıqlayıb. Bu barədə cümə axşamı Avropa Məhkəməsindən məlumat verilib. Məhkəmənin qərarına görə, Azərbaycan hökuməti Əfəndiyevaya 3100 avro və məhkəmə xərcləri üçün 1550 avro ödəməlidir.
Avropa Məhkəməsinin 2007- ci il oktyabrın 25 - də çıxardığı qərarda iddiaçının İnsan Hüquqları və Azadlıqlarının Müdafiəsi Haqqında Konvensiyanın 6 - cı (ədalətli məhkəmə araşdırması hüququ) və Konvensiyanın 1 saylı Protokolunun 1 - ci maddəsi (mülkiyyət hüququ) ilə təminat verilən hüquqlarının pozulmasını tanıyıb.
Əfəndiyeva birinci ərizəsində onun Respublika Doğum Evinin baş həkimi vəzifəsinə bərpası barədə qətnamənin icra edilməməsindən şikayət verib.
Əfəndiyeva 1993 - cü ilin dekabr ayında keçmiş səhiyyə naziri Əli İnsanovun əmri ilə Respublika Doğum Evinin baş həkimi vəzifəsindən azad edilib.
Trend - un arayışı: Dövlət çevrilişinə cəhd, kütləvi iğtişaşlara hazırlığa görə 2005 - ci ilin oktyabrında həbs olunmuş sabiq səhiyyə naziri Əli Insanov 2008 - ci ildə məhkəmənin hökmü ilə korrupsiya cinayətlərində təqsirli bilinərək, əmlakı müsadirə olunmaqla 11 il azadlıqdan məhrum edilib.
Sabiq nazirə verilən cəzanın 3 ili Əfəndiyevanın işi ilə bağlı çıxarılan məhkəmə qətnaməsinin icra olunmamasına görə təyin olunub.
1994 - cü il sentyabrın 9 - da Nəsimi rayon məhkəməsinin qətnaməsi ilə Əfəndiyeva işinə bərpa olunsa da, İnsanov məhkəmə qətnaməsini icra etməkdən boyun qaçırıb. Məhkəmə qərarını icra etmədiyi üçün, hazırda həbsdə olan sabiq səhiyyə naziri barəsində 10 yanvar 1995 - ci ildə cinayət işi açılıb. Sonradan həmin cinayət işi xitam olunub.
Əfəndiyeva ötən il iyulun 11 - də səhiyyə naziri Oqtay Şirəliyevin əmri ilə əvvəlki işinə bərpa olunub.
Avropa Məhkəməsi ilk qərarında ədalətli kompensasiya məsələsini həll etməyərək bildirib ki, hökumət şikayətçinin pozulmuş hüquqlarını 3 ay müdətinə bərpa etməzsə, kompensasiya üzrə şikayətə baxılacaq. Avropa Məhkəməsi kompensasiya ilə bağlı məsələyə yenidən baxaraq, qərar qəbul edib.
Məqalə müəllifi ilə əlaqə ünvanı: [email protected]