Azərbaycan, Bakı, 06 fevral / Trend , müxbir K.Zərbalıyeva/ Azərbaycan məhkəməsi dövlətə xəyanətə görə məhkum olunmuş "Talışın səsi" ("Tolışi sədo") qəzetinin baş redaktorunun Milli Təhlükəsizlik Nazirliyinə (MTN) qarşı əqli mülkiyyət hüququnun pozuntusu ilə bağlı şikayətini təmin etməyib.
Baş redaktor Novruzəli Məmmədovun vəkili Ramiz Məmmədov cümə günü Trend -a bildirib ki, Bakı Apellyasiya Məhkəməsinin bu gün keçirilən iclasında Bakının Səbail Rayon Məhkəsinin qətnaməsinin qüvvədə saxlanılması barədə qərar qəbul olunub.
Məmmədov bildirib ki, baş redaktor həbs olunarkən ona məxsus prosessor 2007-ci il fevralın 16-da MTN əməkdaşları tərəfindən maddi sübut kimi götürülüb.
Prosessor qaytarılan zaman Məmmədova məxsus 10-a yaxın elmi əsəri məhv edilib.
Baş redaktor əqli mülkiyyət hüququnun məhv edilməsi ilə ona dəyən maddi və mənəvi ziyanın MTN tərəfindən ödənilməsi ilə bağlı məhkəməyə müraciət edib.
Vəkil bildirib ki, Bakı Apellyasiya Məhkəməsinin qərarından Ali Məhkəməyə kasasiya şikayəti verəcək.
Azərbaycan Milli Elmlər Akademiyası Dilçilik İnstitutunun sabiq bölmə müdiri, "Tolişi sədo" qəzetinin baş redaktoru Novruzəli Məmmədov və qəzetin məsul katibi Elman Quliyev 2007-ci ilin fevralında həbs olunublar.
Məhkəmənin hökmü ilə Məmmədov 10, Quliyev isə 6 il müddətinə azadlıqdan məhrum edilib.
Onlar Cinayət Məcəlləsinin dövlətə xəyanət (274) və milli, irqi, dini düşmənçilik yayma (283) maddələri ilə ittiham olunublar.
Məmmədov bu il yanvarın 14-də Bayıldakı 1 saylı İstintaq Təcridxanasından 15 saylı cəzaçəkmə müəssisəsinə köçürülüb.
Məqalə müəllifi ilə əlaqə ünvanı:[email protected]