Azərbaycan, Bakı, 09 fevral / Trend , müxbir V.Məmmədova/ Avropanın ali məktəblərini bitirmiş 5 nəfər şəxs bu il müsabiqə və müsahibədən keçmədən dövlət qulluguna işə qəbul olunacaq.
Azərbaycan Respublikası Prezidenti yanında Dövlət Qullugu Məsələləri üzrə Dövlət Komissiyasının hüquq sektorunun müdiri Vüqar Əsgərov bazar ertəsi Trend Newa-a bildirib ki, həmin mütəxəssislər "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində dövlət hesabına Böyük Britaniya və Fransanın ən nüfuzlu ali məktəblərində təhsil alıblar.
Dövlət Proqramı Prezidentin 16 aprel 2007-ci il tarixli sərəncamı ilə təsdiq olunub.
8 il ərzində 5 min azərbaycanlı gəncin xarici ölkələrin ən nüfuzlu ali məktəblərində dövlət hesabına təhsil alması nəzərdə tutulub. Proqrama əsasən həmin gənclər təhsillərini başa vurandan sonra Təhsil Nazirliyi ilə imzaladıqları müvafiq fərdi müqaviləyə əsasən 5 il ərzində təyinat üzrə müvafiq sahədə müsabiqə və müsabiqədənkənar dövlət qulluğuna işə qəbul edilirlər.
Əsgərov bildirib ki, təhsilini başa vurmuş 5 nəfər mütəxəssisin işlə təmin olunması ilə əlaqədar Dövlət Komissiyası müvafiq orqanlara göndərişlə müraciət edib.
Mütəxəssislərdən 2-si beynəlxalq münasibətlər, biri maliyyə üzrə, biri fransız dilindən tərcüməçi, biri isə beynəlxalq kommersiya münasibətləri hüququ ixtisası üzrə magistraturanı oxuyub.
Onlardan biri Diaspora ilə İş üzrə Dövlət Komitəsinə, biri Vergilər Nazirliyinə, biri Milli Banka 6-cı təsnifat üzrə vəzifəyə qəbul olunublar.
Bir nəfərin Xarici İşlər nazirliyində işə qəbul olunması üçün təqdimat göndərilib.
Sektor müdirinin sözlərinə görə, bu proqram çərçivəsində təhsil almış mütəxəssislərin işlə təmin olunması ilə bağlı qaydalar hazırlanır.
Gələcəkdə həmin şəxslərin işlə təminatı bu qaydalarla tənzimlənəcək.
Məqalə müəllifi ilə əlaqə ünvanı: [email protected]
