Azərbaycan, Bakı, 16 mart / Trend , müxbir K.Zərbalıyeva /
Azərbaycanlı millət vəkili haqda ölüm fitvası verdiyi üçün həbs olunmuş nardaranlıların məhkəməsi martın 28-nə təyin olunub.
Bu barədə Trend -a bazar ertəsi həbs olunmuş nardaranlıarın vəkili Əlövsət Ağamoğlanov məlumat verib.
Trend -un arayışı: 2009-cu il yanvarın 9-da Bakı şəhəri, Nardaran qəsəbəsinin "İmam Hüseyn" meydanında keçirilən mitinqdə kənd ağsaqqalı kimi adı çəkilən Hacı Əli Hüseynov çıxış edərkən Vətəndaş Həmrəyliyi Patiyasının sədri, millət vəkili, xalq şairi, DAK həmsədri Sabir Rüstəmxanlının ünvanına nalayiq sözlər işlətmiş, onu terrorla hədələmişdi.
Yanvarın 24-də Hüseynov şübhəli şəxs qismində saxlanılıb. Yanvarın 26-da Nərimanov rayon məhkəməsi Nardaran sakini barəsində həbs-qətimkan tədbiri seçib.
Digər təqsirləndirilən Hacı Hikmət Vəliyev isə aksiyada millət vəkili Rüstəmxanlının başına 50 min manat pul qoyduğunu, onu öldürənin bu mükafata sahib olacağını bəyan etmişdi.
Faktla əlaqədar Sabunçu rayon Polis İdarəsi tərəfindən Cinayət Məcəlləsinin öldürməklə və ya sağlamlığa ağır zərər vurmaqla hədələmə (134-cü) maddəsi ilə cinayət işi başlanıb.
Cinayət işinnin istintaqını DİN-in Baş Mütəşəkkli Cinayətkarlıqla Mübarizə İdarəsi aparıb.
Vəkil bildirib ki, işə Sabunçu rayon məhkəməsində baxılacaq.
Nardaran ağsaqqallarının ittiham olunduğu maddə ölkənin birinci xanımı, millət vəkili Mehriban Əliyevanın Novruz bayramı münasibətilə Milli Məclisə təqdim etdiyi Amnistiya haqqında qanun layihəsinin təsiri altına düşür.
Martın 17-də MM-in həmin qanun layihəsini qəbul edəcəyi gözlənilir.
Trend -un arayışı: Aksiya zamanı kənd ağsaqqalları Azərbaycanın bəzi ziyalılarının xalqa yalan məlumat verdiyini, bununla millətə xəyanət etdiklərini deyib.
"Sabir Rüstəmxanlı kimi vicdansız ziyalılar millətə xəyanət edir, Azərbaycanın dərdini açıqlayan "Səhər" (İran kanalı nəzərdə tutulur - red.) kanalına böhtan atır. Bu hərəkətlərinə görə onun barəsində Nardaran ağsaqqallarından biri tərəfindən ölüm fitvası çıxarılıb. Sabir Rüstəmxanlı, sən bundan sonra cangüdənlərinin sayını artır" - etiraz aksiyasında açıqlanıb.
Məqalə müəllifi ilə əlaqə ünvanı:[email protected]
