Azərbaycan, Bakı, 30 mart / Trend , müxbir N.Abdullayeva /
Azərbaycan və İordaniya arasında təhsil sahəsində əməkdaşlığın genişləndirilməsi perspektivlərini Ammanda Azərbaycanın Təhsil naziri Misir Mərdanov müzakirə edəcək.
Mərdənovun başçılıq etdiyi nümayəndə heyəti aprelin 19-da İordaniyada olacaq. Bu barədə Trend -a telefonla Azərbaycanın İordaniyadakı səfiri Elman Araslı bildirib.
"Təhsil sahəsində üçillik əməkdaşlıq planının müddəti başa çatıb, lakin görüş çərçivəsində yeni əməkdaşlıq planı imzalana bilər", - deyə Araslı bildirib.
"Ammanda keçirilən görüşlərdə kadr hazırlığı, elmi kadr, tələbə mübadiləsi və bu kimi məsələlər müzakirə ediləcək", - deyə səfir bildirib.
Ötən ilin yanvar ayının 31-də İordaniyanın Təhsil Nazirliyinin nümayəndə heyəti Bakıda səfərdə olub. Təhsil nazirlərinin görüşləri çərçivəsində Azərbaycan və İordaniya arasında təhsil sahəsində əməkdaşlıq perspektivləri müzakirə edilib. Həmçinin iki ölkə arasında təhsil sahəsində əlaqələrin möhkəmlənməsi, diplomların qarşılıqlı şəkildə qəbulu, tələbə və müəllim mübadiləsi, Azərbaycan və İordaniya alimlərinin iştirakı ilə müxtəlif konfrans və simpoziumların keçirilməsi kimi məsələlər müzakirə edilib.
Məqalə müəllifi ilə əlaqə ünvanı: [email protected]
