Azərbaycan, Bakı, 10 aprel / Trend , müxbir N.İsmayılova /
Yeni Azərbaycan Partiyasının mənzil-qərargahında keçirilən mətbuat konfransı zamanı Azərbaycan Dövlət Statistika Komitəsinin sədri Arif Vəliyev deyib ki, Azərbaycanda 13-22 apreldə keçiriləcək əhalinin siyahıya alınması ilə bağlı hazırlıq işləri tamamlanıb.
"Əhalinin siyahıya alınması məqsədilə 2009-cu ildə dövlət büdcəsindən 8 milyon manat ayırmaq nəzərdə tutulub. Prosesin reallaşmasına cəlb olunan işçilərin əmək haqlarını verməkdən ötrü büdcədən daha 1,5 milyon manat ayrıla bilər", - Vəliyev deyib.
Onun sözlərinə əsasən, əhalinin siyahıya alınması üçün hazırlıq işləri artıq başa çatıb və siyahıya alınmanın həyata keçirilməsinə 24 min işçi cəlb olunub. İşçilər aprelin 13-də vəzifələrinin icrasına başlayacaqlar.
Vəliyevin sözlərinə görə, Dövlət Komitəsinin keçirdiyi hazırlıq işləri, ilk növbədə, bir məntəqənin əhalisinin səhv üzündən digər məntəqədə qeydə alınması hallarının qarşısını almaqdan ötrü rayonların sərhədlərini təyin etməkdən ibarət olub. İkincisi, ərazilərin bölünməsi üçün vacib olan, əhalisinin sayı 5 mindən artıq hər bir yaşayış məntəqəsinin sxematik planının hazırlanması olub.
"Artıq 19 min hesablama məntəqəsi var. Hər beş məntəqəyə bir instruksiya mərkəzi düşür və hər yeddi instruksiya mərkəzinə bir hesablama mərkəzi", - Vəliyev bildirib.
Onun sözlərinə əsasən, aprelin 1-nə ölkə əhalisi 8,7853 milyon nəfər təşkil edib və siyahıyaalma bu rəqəmin dəqiqləşdirilməsi üçün çox vacibdir.
Dövlət Statistika Komitəsi siyahıyaalma üzrə hesabatların qəbuluna mayın ikinci yarısından başlayacaq. Bundan ötrü Dövlət Komitəsi tərəfindən cəlb olunmuş 200 əməkdaş verilənlərin komitənin kompüter bazasına daxil edilməsi ilə məşğul olacaqlar.
"Təqribən gələn ilin ortaları üçün hesablamaların nəticələrinə əsasən, materialların işlənməsi başa çatacaq və hesabatlar kitab şəklində çap ediləcək", - Vəliyev deyib. Onun sözlərinə əsasən, ölkənin bütün rayonları üzrə 10 cildlik kitabın nəşri nəzərdə tutulub.
Siyahıyaalma çərçivəsində suallar vərəqəsinə 29-u bir başa şəxsin özünə aid olan 35 sual daxildir. Sualların qalan altısı yaşayış-kommunal şəraitinə aiddir.
Ötən il Dövlət Komitəsi test rejimində əhalinin siyahıya alınmasını keçirib və pilot rayon olaraq Şamaxı seçilib.
Buna qədər 1999-cu ildə keçirilən əhalinin siyahıya alınması 2,5 miyon manata başa gəlib. O vaxt Azərbaycanın əhalisi 7,9 milyon nəfər təşkil edib. 2009-cu ilin yanvar ayının 1-nə olan əhalinin sayı 8,73 milyon nəfərə çatıb. Onlardan 49 faizi kişilər, 51,7 faizi qadınlar təşkil edib. Şəhər əhalisi isə 48,3 faizi təşkil edib.
Aprelin 10-na olan rəsmi məzənnə 0,8032 AZN/USD təşkil edir.
Məqalə müəllifi ilə əlaqə ünvanı: [email protected]
