Azərbaycan, Bakı, 04 may / Trend ,müxbir K.Zərbalıyeva /
Azərbaycanda dövlət qulluğu vəzifələrinin təsnifatları üzrə müsabiqə qaydalarında dəyişikliklər nəzərdə tutulub.
Prezident yanında Dövlət Qulluğu Məsələləri üzrə Dövlət Komissiyasının sədri Bəhram Xəlilov bazar ertəsi Trend -a müsahibəsində bildirib ki, komissiya təsnifatlar arasındakı fərqi nəzərə alaraq həmin təsnifatlar üzrə müsabiqə şərtlərinin dəyişdirilməsi ilə bağlı müvafiq təkliflər hazırlayaraq Milli Məclisə təqdim edib.
Xəlilovun sözlərinə görə, 9-cu təsnifatla 6-cı təsnifat üzrə vəzifələrdə həm məsuliyyət, həm vəzifə, həm də əmək haqqı baxımından fərqlər var.
"Təbii ki, həmin təsnifatlar üzrə vəzifələr üçün fərqli tələblər olmalıdır. O cümlədən, test imtahanlarının sualları ilə bağlı. Fikrimiz var ki, həm sualların çətinliyi, həm namizədin imtahana hazırlıqla bağlı istifadə etdiyi mənbələr, həm sualların cavablandırılması üçün ayrılan vaxt, həm də keçid balları da fərqli olsun",-deyə komissiya rəsmisi vurğulayıb.
Xəlilov bildirib ki, dövlət qulluqçularına daha çox İqtisadi İnkişaf, Əmək və Əhalinin Sosial Müdafiə nazirliklərində və Dövlət Sosial Müdafiə Fondunda tələbat var.
Adıçəkilən dövlət qurumları müsabiqələrə ən çox vakant vəzifələr təqdim edirlər. Belə ki, təkcə son müsabiqəyə İqtisadi İnkişaf Nazirliyi 83, Əmək və Əhalinin Sosial Müdafiəsi Nazirliyi 78 və Dövlət Sosial Müdafiə Fondu 61 vakant dövlət qulluğu vəzifəsi təqdim edib.
Xəlilov müsabiqə yolu ilə dövlət qulluğuna qəbul olunmuş namizədlər barəsində indiyədək Komissiyaya həmin qurumların rəhbərliyindən şikayət daxil olmadığını deyib: "Bizə, təqdim etdiyimiz namizədlərin həmin dövlət orqanının rəhbərliyi tərəfindən sıxışdırılması, hüquqlarının pozulması ilə bağlı fakt, müraciət daxil olmayıb".
Komissiya sədri müsabiqə yolu ilə dövlət qulluğuna qəbul olmuş şəxslərin həmin qurumların rəhbərliyi tərəfindən sıxışdırıldığı, onların hüquqlarının pozulduğu və bu əsasla da dövlət qulluğundan imtina etmələri barədə yayılan fikirləri də əsassız sayır.
"Dövlət qulluğuna qəbul olunmuş bütün namizədlərlə işə başlamazdan öncə görüş keçiririk, onlara hüquq və vəzifələrini izah edirik. Hər hansı bir problem yarandıqda komissiyaya müraciət etmək imkanlarının olduğunu izah edirik və onlarda əminlik yaradırıq ki, problemləri qanunvericilikdə nəzərdə tutulan qaydada həll olunacaq", - deyə Xəlilov vurğulayıb.
Xəlilov bildirib ki, dövlət qulluğuna qəbul olunmuş şəxslərin bir neçəsi dövlət qulluğunda bir müddət çalışdıqdan sonra özəl sektorda daha yüksək əmək haqqı olan vəzifə təklif olunduğu üçün öz istəkləri ilə vəzifələrindən azad olunublar.
Komissiya sədri dövlət qulluğuna müsabiqədənkənar qəbulla bağlı halların olduğunu istisna etməyib və qeyd edib ki, dövlət orqanlarında bununla bağlı keçirdikləri monitorinqlər zamanı bir neçə belə fakt aşkarlayıblar.
"Dövlət qulluğu haqqında qanunvericiliyə müsabiqədənkənar dövlət qulluğuna qəbul edilmə halının dövlət qulluğuna xitam verilməsi üçün əsas olması ilə bağlı əlavə olunub. Əgər belə faktlar varsa və onun üstü bir aydan, iki ildən sonra da açılsa, həmin şəxsin dövlət qulluğuna xitam veriləcək", - Xəlilov bildirib.
Komissiya rəsmisi qeyd edib ki, aşkar olunan faktlarla bağlı dövlət orqanının rəhbərliyinə komissiya tərəfindən təqdimat göndərilib və həmin şəxslərin dövlət qulluğuna xitam verilib.
Həmin şəxslər sırasından bir qismi elan olunmuş müsabiqələrdə sonradan iştirak edib və onlar arasında müsabiqə yolu ilə dövlət qulluğuna qəbul edilənlər də olub.
Xəlilov deyib ki, dövlət qulluğuna müsabiqədənkənar qəbul həyata keçirmiş dövlət orqanının rəhbəri barəsində qanunvericilik hər hansı cəza nəzərdə tutmur.
"Bu hal dövlət orqanı rəhbərinin işində verdiyi nöqsan kimi qiymətləndirilir", - Xəlilov deyib.
Komissiya sədri Milli Məclisin dövlət qulluğu ilə bağlı qanunvericiliyə edilən son dəyişikliyə də aydınlıq gətirib.
Qeyd edib ki, yeni dəyişikliyə əsasən, dövlət qulluğunda inzibati vəzifələrin altıncı-doqquzuncu təsnifatlarına uyğun olan vəzifələrin tutulması məqsədilə ilk növbədə həmin dövlət orqanında inzibati vəzifələrdə qulluq keçən və inzibati vəzifələrin təsnifatına uyğun ixtisas dərəcəsi olan dövlət qulluqçuları üçün müsahibə keçiriləcək. Bu müsahibə nəticəsində inzibati vəzifə tutulmadıqda digər şəxslərin iştirakı ilə müsahibə və ya müsabiqə keçirilə bilər.
"Tutaq ki, hansısa bir məsləhətçi bu vəzifədə bir neçə ildir çalışır və rəhbərlik onun baş məsləhətçi kimi çalışmasında problem görmür. Bu proseduru sadələşdirmək üçün qanunvericiliyə belə bir dəyişikliyin edilməsini təklif etdik. Əgər hansısa dövlət orqanında belə namizəd varsa, onu vəzifədə qaldırmaq üçün yalnız həmin şəxslə komissiyanın nümayəndəsinin iştirakı müsahibə keçiriləcək. Dövlət orqanlarının istəyini nəzərə alıb belə bir təklif irəli sürdük. Bu dəyişiklik 6-9-cu təsnifat çərçivəsində karyera yüksəlişi üçün nəzərdə tutulub", - deyə Xəlilov bildirib.
Dövlət qulluqçularının reystrinə başlandığını deyən Xəlilov 10 minə yaxın dövlət qulluqçusunun reystrə daxil edildiyini bildirib.
Komissiya sədri reystr proqramının da gələcəkdə dəyişdiriləcəyini deyib.
"Həmin dəyişiklik dövlət qulluqçuları barədə bütün məlumatların onlayn sistemində təqdim edilməsini nəzərdə tutur", - Xəlilov deyib.
Xəlilov dövlət qulluqçularının etik davranışı ilə bağlı dövlət orqanlarından məlumat toplandığını və həmin məlumatların ümumiləşdirilməsinin aparılacağını deyib.
Onun sözlərinə görə, həmin məlumatlar Korrupsiyaya qarşı Mübarizə üzrə Dövlət Komissiyasının hazırlayacağı hesabata daxil ediləcək və bu barədə məlumatlar ictimaiyyətə açıqlanacaq.
Xəlilov ilbəil dövlət qulluğuna qəbul olunmaq istəyən şəxslərin sayının artacağına əminliyini bildirib. Onun fikrincə, vətəndaşlar şəxsi keyfiyyətlərinə və biliklərinə görə dövlət qulluğuna qəbul oluna biləcəklərinə inanmalıdırlar və bu inam olarsa, dövlət qulluğuna maraq artacaq.
"Azərbaycanda dövlət qulluğuna maraq həmişə çox olub. Dövlət qulluqçularının sosial müdafiəsi üçün lazimi şərait yaradılıb. Dövlət qulluqçusunun gələcəkdə vəzifədə yüksəliş imkanı, pensiya təminatları var. Çox vətəndaş bundan xəbərsizdi", - Xəlilov bildirib.
Məqalə müəllifi ilə əlaqə ünvanı: [email protected]
