Azərbaycan, Bakı,10 avqust / Trend , müxbir H.Bağırov /
Azərbaycan paytaxtında terror barədə yalan məlumat verən tələbənin məhkəməsi başlayıb.
Ağır Cinayətlərə Dair İşlər üzrə Məhkəmədən bazar ertəsi Trend -a verilən məlumata görə, Azərbaycan Beynəlxalq Universitetinin 3-cü kurs tələbəsi, 20 yaşlı Göyçay rayon sakini Gülər Əfəndiyeva ifadə verərək özünü təqsirli bilib.
Mayın 22-də rayonun Cəfər Xəndan küçəsi, mənzil 10-da yaşayan Firəngiz Əliyeva ərizə ilə müraciət edərək bildirib ki, həmin gün saat 00.10 radələrində naməlum şəxslər evə zəng edib, keçmiş Karl Marksın heykəli olan əraziyə partlayıcı qurğunun qoyulduğunu və təcili olaraq evi tərk etməsini deyiblər.
Keçirilən əməliyyat-axtarış tədbirləri nəticəsində naməlum zəngdə şübhəli bilinən Azərbaycan Beynəlxalq Universitetinin 3-cü kurs tələbəsi, 20 yaşlı Göyçay rayon sakini Gülər Əfəndiyeva və onun həmyerlisi, Bakı-Slavyan Universitetinin 1-ci kurs tələbəsi, 19 yaşlı Fidan Əliyeva saxlanılıb.
Əfəndiyeva ifadəsində bildirib ki, Firəngiz Əliyevanın telefon nömrəsini rəfiqəsi və həmyerlisi, Bakı-Slavyan Universitetinin 1-ci kurs tələbəsi, 19 yaşlı Fidan Əliyevadan alıb.
Ev sahibəsi ilə zarafat etdiyini deyən Əfəndiyeva əməlindən peşman olduğunu deyib.
Zərərçəkmiş Firəngiz Əliyeva isə Əfəndiyevadan şikayətçi olmadığını deyib və əsl günahkarın Fidan Əliyeva olduğunu iddia edib.
Hadisədən sonra həbs olunan Fidan Əliyeva istintaq dövründə şahid kimi tanınıb və həbsdən azad edilib.
Əfəndiyeva Cinayət Məcəlləsinin terrorçuluq barədə bilə-bilə yalan məlumat vermə (216) maddəsi ilə ittiham olunur.
Məqalə müəllifi ilə əlaqə ünvanı: [email protected]