Azərbaycan, Bakı, 14 oktyabr / Trend , müxbir E.Ostapenko/
Avropada Təhlükəsizlik və Əməkdaşlıq Təşkilatı (ATƏT) Azərbaycan hökumətini jurnalistlərin peşə səhvlərinə, həmçinin böhtana görə təqib olunması və həbsinə son qoymağa çağırır. Bu barədə təşkilatın rəsmi məlumatında deyilir.
"Mən Azərbaycan hökumətindən xahiş edirəm ki, böhtana görə cinayət məsuliyyətinin tamamilə götürülməsi üçün islahatlara başlasın. Azərbaycanda belə hallara birdəfəlik son verilməsinin vaxtı çatıb" , - ATƏT-in mətbuat azadlığı üzrə nümayəndəsi Mikloş Haraşti deyib.
Son zamanlar Azərbaycanda böhtana görə beş jurnalistlə bağlı hökm çıxarılıb, onlardan ikisi həbs cəzasına məhkum edilib.
Oktyabrın 8-də "Nota" qəzetinin baş redaktoru Sərdar Əlibəyli və qəzetin müxbiri Fəraməz Allahverdiyev Bakı Apellyasiya Məhkəməsindəki prosesdə uduzublar və böhtana görə üç aylıq həbs cəzası alıblar. "Nota"qəzetinin digər müxbiri Ramiz Tağıyev də böhtana görə altı aylıq həbs cəzası alıb.
Böhtana görə Bakı məhkəməsi Fanat.az saytının rəhbəri Zahid Əzəməti və saytın əməkdaşı Natiq Muxtarlıya hökm çıxarıb. Zahid Əzəmət altı ay müddətinə, Natiq Muxtarlı isə bir il müddətinə islah əmək işlərinə məhkum edilib.
Haraşti bu həbslərlə bağlı narahatlığını Azərbaycanın xarici işlər naziri Elmar Məmmədyarova yazdığı məktubunda da qeyd edib.
"Mən, peşə səhvlərinə görə jurnalistlərin həbsinin yolverilməz olduğu qeyd olunan Avropa Məhkəməsinin insan haqları presedentinə zidd olan bu son məhkəmə işlərinə yenidən baxılması xahişilə sizin hökumətə müraciət edirəm", - məktubda deyilir.
Məqalə müəllifi ilə əlaqə ünvanı: [email protected]
