Azərbaycan, Bakı, 09 noyabr / Trend , müxbir H.Bağırov /
Azərbaycanın Siyəzən rayonunda 5 il əvvəl ağır cinayət törətməkdə təqsirli bilinən şəxsin məhkəməsi başlayıb.
Ağır Cinayətlərə Dair İşlər üzrə Məhkəmədən bazar ertəsi Trend -a verilən məlumata görə, Vaqif Mahmudovun cinayət işi üzrə məhkəmənin hazırlıq iclası keçirilib. 2005-ci ilin dekabrın 28-də Siyəzən rayonunun Qara Siyəzən kəndi ərazisində Mahmudov qızı, 24 yaşlı Dilguşə Mahmudovanı əxlaqsızlıq hərəkətlərinə görə qətlə yetirib.
Müəyyən edilib ki, Mahmudova nişanlı ola-ola başqa bir kişi ilə qeyri-qanuni bir yerdə yaşayıb. Bundan sonra nişanı qaytarılan Mahmudovadan ailə üzvləri üz döndəriblər. 24 yaşlı qadın bir müddət Naftalanda yaşayan bacısının evində yaşayıb.
Bacısının davranışlarından razı qalmayan böyük bacı onu Naxçıvanda yaşayan qardaşının yanına göndərib. Lakin qardaşı da bacısını yanında saxlamağa razılıq verməyib.
Naxçıvandan qayıdan Mahmudovanı Bakıda atası Vaqif Mahmudov qarşılayıb və onu Qara Siyəzən kəndindəki atası Əlisoltana məxsus evə aparıb. Ata həmin evdə qızını boğaraq öldürüb. Meyiti isə həyətdəki ayaqyolu quyusuna atıb.
Siyəzən rayon Polis Şöbəsi əməkdaşlarının keçirdiyi əməliyyat tədbirləri nəticəsində bu il iyulun 26-da cinayətin üstü açılıb və Mahmudov məsuliyyətə cəlb edilib.
Təqsirləndirilən şəxs Cinayət Məcəlləsinin qəsdən adam öldürmə (120.2.4, 120.2.6) maddəsi ilə təqsirli bilinir. Məhkəmə baxışı noybarın 19-na təyin edilib.
Məqalə müəllifi ilə əlaqə ünvanı: [email protected]
