Azərbaycan, Bakı, 29 dekabr / Trend , müxbir H.Bağırov/
Azərbaycan məhkəməsi həbsdə olan dünya çempionunun apelyasiya şikayətini təmin etməyib.
Trend -un məlumatına görə, bu gün Bakı Apelyasiya Məhkəməsində Litva vətəndaşı, uzunluğa tullanma üzrə dünya çempionu Turskis Tomas və Pakistan vətəndaşı Zahoor Xan Əhməd oğlunun apelyasiya şikayətinin təmin edilməməsi ilə bağlı qərar elan edilib.
Qərara görə, Ağır Cinayətlərə Dair İşlər üzrə Məhkəmənin hökmü dəyişdirilmədən saxlanılıb.
Təqsirləndirilən şəxslərin hər biri Ağır Cinayətlərə Dair İşlər üzrə Məhkəmənin hökmü ilə 14 il müddətinə azadlıqdan məhrum ediliblər.
Adıçəkilənlər şəxsiyyətləri istintaqla müəyyən edilməmiş İxrac, Arturas və Kristis adlı digər şəxslərlə mütəşəkkil dəstə yaradaraq respublikanın gömrük sərhədindən qaçaqmalçılıq yolu ilə satış üçün qanunsuz olaraq külli miqdarda narkotik vasitəni Azərbaycana keçirməkdə günahlandırılırlar.
Zahoor Xan Əhməd oğlu may ayının ortalarında qanunsuz olaraq ümumi çəkisi 6 kq 952 qram heroini İxrac adlı şəxsdən qəbul edib, onun tapşırığı ilə mütəşəkkil dəstənin digər üzvü Turskis Tomasa çatdırmalıymış.
Zahoor Xan Əhməd oğlu heroini Pakistandan İrana gətirib, oradan isə Astara Gömrük İdarəsinin ərazisindən, Azərbaycanın gömrük sərhədindən gömrük nəzarətindən gizli keçirərkən yaxalanıb.
Turskis Tomas ifadəsində bildirib ki, Bakıya istirahət üçün gəlib. Oteldə olarkən Arturas ona zəng edərək göndərdiyi çemodanı oteldə 209-cu otaqda qalan pakistanlıya çatdırmağı xahiş edib və ona bunun müqabilində 5000 avro veriləcəyini vəd edib. Tomas bildirib ki, çemodanın içərisində narkotik olmasından xəbəri olmayıb. O, çemodanı həmin şəxsə çatdırarkən saxlanılıb.
Zahoor Xan Əhməd oğlu isə bez ticarəti ilə məşğul olduğunu bildirib. Onun sözlərinə görə, Azərbaycana keçirdiyi çemodanda narkotik yerləşdirilməsindən yalnız həbs olunandan sonra xəbər tutub.