Azərbaycan, Bakı, 29 mart / Trend , müxbir A.Hüseynbala/
Azərbaycan Parlamentinin deputatları hesab edirlər ki, ermənilərin 1918-ci ildə azərbaycanlılara qarşı törətdiyi kütləvi qətl hadisələrinin soyqırım kimi tanınması üçün zəruri addımlar atılmalıdır.
"1918-ci ildə Bakıda və ölkənin digər bölgələrində törədilən qətliama beynəlxalq hüquqi qiymət verilmədiyindən, ermənilər Xocalı soyqırımını törətməkdən çəkinmədilər", - bazar ertəsi Trend -a Ana Vətən Partiyası (AVP) sədrinin müavini, millət vəkili Zahid Oruc bildirib.
Trend -un arayışı: 1918-ci ilin mart ayında hakimiyyəti ələ keçirmiş daşnaqlar Stepan Şaumyanın rəhbərliyi ilə Azərbaycan xalqına qarşı amansız soyqırım törədiblər.
Mart-aprel aylarında Bakı, Şamaxı və digər bölgələrdə 50 mindən artıq günahsız azərbaycanlı amansızcasına qətlə yetirilib. O zaman qardaş Türkiyə (Osmanlı İmperiyası) Azərbaycana yardım əlini uzadıb və bununla azərbaycanlılar ermənilər tərəfindən törədilən kütləvi soyqırımdan xilas olublar.
1992-ci il fevralın 26-da Ermənistan hərbi birləşmələri tərəfindən yeddi min əhalisi olan Xocalı şəhərində soyqırım aktı həyata keçirilib. Əhalinin xeyli hissəsi 4 aydan artıq zaman ərzində mühasirədə olduğundan Ermənistan hərbi birləşmələrinin şəhərə hücumu zamanı burada yalnız üç minə yaxın insan qalmışdı. Xocalı soyqırımı zamanı 613 nəfər ödürülüb, 1000 nəfər müxtəlif yaşlı dinc sakin aldığı güllə yarasından əlil olub. 106 nəfər qadın, 63 azyaşlı uşaq, 70 qoca öldürülüb. 8 ailə tamamilə məhv edilib, 25 uşaq hər iki valideynini, 130 nəfər valideynlərindən birini itirib. Faciə baş verən gecə 1275 nəfər dinc sakin girov götürülüb, onlardan 150 nəfərin taleyi indi də məlum deyil.
Ümummilli lider Heydər Əliyevin 1998-ci ildə imzaladığı fərmana əsasən, 31 mart Azərbaycanlıların Soyqırımı Günü kimi qeyd edilir.
Orucun sözlərinə görə, 1918-ci ildə Bakıda və Azərbaycanın müxtəlif bölgələrində kütləvi insan qırğınları törədilib.
"Biz şübhəsiz ki, bu məsələləri daha ciddi tələblə ortalığa qoymalıyıq. Hesab edirəm ki, saxta "erməni soyqırımı" ilə bağlı beynəlxalq səviyyədə təbliğatın daha da genişləndiyi indiki mərhələdə biz də mart qırğınlarına dünya ictimaiyyətinin diqqətini daha çox cəlb etməliyik", - millət vəkili əlavə edib.
Onun fikrincə, ermənilər saxta "soyqırım"la bağlı məqsədlərinə nail olarlarsa, bu, Dağlıq Qarabağ münaqişəsinin nizamlanması prosesində Azərbaycanın səylərinə də çox mənfi təsir göstərəcək.
Millət vəkili deyib ki, bunu nəzərə alaraq Türkiyə ilə bərabər Azərbaycanda törədilən soyqırımların tanıdılması üçün birgə proqramlar hazırlanmalıdır.
"Bu, saxta "erməni soyqırımı" iddialarına sadəcə bir cavab reaksiyası kimi düşünülməməlidir. Biz həmin hadisələri dərsliklərə daxil etməliyik, müxtəlif elmi beynəlxalq tədbirlər keçirməliyik. Azərbaycanla Türkiyənin lobbi təşkilatlarının bu məsələdə biraraya gəlməsi də olduqca vacibdir", - Oruc xatırladıb.
"Ermənilərin 1918-ci ilin mart ayında törətdikləri soyqırıma dünya ictimaiyyətinin diqqətini daha çox cəlb etmək məqsədilə təbliğatımızı gücləndirməliyik", - bazar ertəsi Trend -a tarixci ailm, millət vəkili Cəmil Həsənli bildirib.
Onun sözlərinə görə, 2009-cu ildə Milli Təhlükəsizlik Nazirliyinin himayədarlığı ilə mart soyqırımı ilə bağlı sanballı bir kitab nəşr olunub.
"Hesab edirəm ki, bu, həmin hadisələri dünya ictimaiyyətinin diqqətinə çatdırmaq üçün uğurlu addımlardan biri idi. Azərbaycanın mərhum Prezidenti Heydər Əliyevin fərmanı ilə 31 mart soyqırım günü kimi də qeyd edilir. Artıq bu barədə yazılan kitablar da Azərbaycanın hüdudlarından kənara çıxır", - Həsənli vurğulayıb.
Millət vəkili deyib ki, Milli Məclis də bununla bağlı dünya parlamentlərinə, xalqlarına müraciət edib.
"Bu istiqamətdə nə mümkündürsə edilib, amma dünyada 31 mart hadisələrinin soyqırım kimi tanıdılması üçün Azərbaycanın və Türkiyənin lobbi təşkilatlarının birgə çalışmasına ehtiyac var. Düşünürəm ki, bu halda erməniləri saxta "erməni soyqırımı" iddialarından da geri çəkindirmək mümkün olacaq", - o bildirib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
