Azərbaycan, Bakı, 27 oktyabr /Trend, müxbir K.Zərbalıyeva/
Azərbaycan Konstitusiya Məhkəməsi Ali Məhkəmənin sorğusu əsasında Mülki Məcəllənin 178.8-ci maddəsinə şərh verib.
KM-dən Trend-ə verilən məlumata görə, Fərhad Abdullayevin sədrliyi ilə Mülki Məcəllənin 178.8-ci maddəsinin şərh edilməsinə dair Ali Məhkəmənin sorğusu ilə bağlı konstitusiya işinə baxılıb.
Sorğu ilə bağlı KM-in Plenumunun qəbul etdiyi qərarda qeyd olunur ki, Mülki Məcəllənin 178.8-ci maddəsi həmin Məcəllənin 146.1-ci, 146.2-ci, 178.1-ci və 178.2-ci maddələrinin və Mənzil Məcəlləsinin 113-cü maddəsinin müddəalarına uyğun olaraq tətbiq edilməlidir.
Kooperativin üzvü və pay yığımına hüququ olan digər şəxslər kooperativin verdiyi mənzil, bağ, qaraj və ya ayrı qurğu üçün pay haqqını tam verdikdə həmin əmlaka sahiblik və istifadə etmək hüququnu, daşınmaz əmlakın dövlət reyestrində qeydə alındıqdan sonra isə sərəncam vermək hüququnu əldə edirlər.
