Azərbaycan, Bakı, 29 oktyabr /Trend, müxbir K.Zərbalıyeva/
Ailə, Qadın və Uşaq Problemləri üzrə Dövlət Komitəsi hesab edir ki, Azərbaycanda nikah müqaviləsinin bağlanmasına marağın artması üçün geniş maarifləndirməyə ehtiyac var.
Dövlət Komitəsinin ailə problemləri şöbəsinin müdiri Gülnarə Məmmədova cümə günü Trend-ə bildirib ki, vətəndaşlar arasında nikah müqaviləsinin bağlanmasının üstünlükləri ilə bağlı maarifləndirmə aparılmalı, insanlara bu müqavilənin bağlanmadığı halda yaranan fəsadlar izah olunmalıdır.
Nika müqaviləsinin nikah pozularkən yaranan problemlərin sivil qaydada həllinə imkan yaratdığını deyən şöbə müdiri bildirib ki, nikaha girən şəxslər müqavilənin üstünlüklərini dərk edəndən sonra müqavilə bağlamağa maraqlı olacaqlar.
Aparılan maarifləndirmənin müsbət nəticələndiyini deyən komitə rəsmisi qeyd edib ki, əvvəlki illərlə müqayisədə nikaha girənlər arasında bağlanan nikah müqavilələrinin sayı artır.
Onun sözlərinə görə, 2007-ci ildə bu göstərici 16, 2008-ci ildə 33, 2009-ci ildə isə 60-dan artıq olub.
Nikah müqaviləsi nikaha daxil olan şəxslər arasında bağlanan, nikah dövründə və ya nikah pozulduqda ər ilə arvadın əmlak hüquqlarını və vəzifələrini müəyyən edən sazişdir. Nikah müqaviləsi yazılı formada bağlanır və notariat qaydada təsdiq olunur. Nikah müqaviləsində tərəflərin bir-birini qarşılıqlı saxlaması, bir-birinin gəlirlərində iştirak üsulları, hər birinin ailə xərclərində iştirak qaydası ilə bağlı hüquq və vəzifələri, nikah pozulduqda hər birinə düşəcək əmlakı müəyyənləşdirmək hüququ nəzərdə tutulur.
Nikah müqaviləsi ər ilə arvadın mövcud olan və gələcəkdə əldə edəcəkləri əmlaka dair bağlana bilər. Nikah müqaviləsi nikaha qədər və nikahdan sonra da bağlana bilər. Müqavilə nikaha qədər bağlansa da, bu nikah qeydə alındığı gündən qüvvəyə minir. Müqavilədə əmlakın hüquqi rejimi müəyyən olunur.
Şöbə müdirinin sözlərinə görə, bəzən yanlış olaraq düşünürlər ki, nikaha girən tərəf müqavilənin bağlanmasını tələb edirsə, bu qarşı tərəfə etibarsızlıq kimi qiymətləndirilir.
"Bizim ailələrdə çox vaxt valideynlər nikah pozularkən uşaqlardan müəyyən məqsədlər üçün vasitə kimi istifadə edirlər. Bu isə uşaqların psixologiyasına ciddi zərbə vurur. Tərəflər arasında nikah müqaviləsi olarsa, boşanan zaman qadınların və uşaqların vəziyyəti daha yaxşı olar", - şöbə müdiri bildirib.