Azərbaycan, Bakı, 4 noyabr /Trend, müxbir М.Əliyev/
Azərbaycan Milli Elmlər Akademiyası 2011-ci ildə əsas diqqəti elmi institutların müasir avadanlıqla təmin olunmasına yönəldəcək. Bu barədə cümə axşamı Trend-ə AMEA-nın prezidenti Mahmud Kərimov deyib.
"Azərbaycanın 2011-ci il dövlət büdcəsinə əsasən AMEA-ya ayrılan vəsaitlər 2-3 faiz artıb. Əsasən həmin vəsaitlər müasir elmi avadanlıqlar və cihazların alınmasına yönəldiləcək", - Kərimov deyib.
Onun sözlərinə görə, AMEA artıq üçüncü ildir ki, institutların elmi avadanlıq bazasının yenilənməsinə başlayıb.
"Müasir elm müasir maddi-texniki baza olmadan inkişaf edə bilməz", - Kərimov deyib.
Hazırda AMEA yanında bir neçə fiziki-riyazi, texniki, kimyəvi, humanitar və ictimai elmlər şöbəsi və regional Naxçıvan şöbəsi fəaliyyət göstərir. Elmi şöbələrin tərkibinə elmi institutlar və elmi xidməti müəssisələr, komissiyalar, komitələr, elmi cəmiyyətlər, nəşriyyatlar daxildir. Naxçıvan tədqiqat şöbəsini geniş elmi istiqamətlər əhatə edir.
Akademiyada 48 elmi-tədqiqat, 9 konstruktor-texnoloji müəssisə, dörd muzey, iki rəsədxana, üç təcrübə-tədqiqat zavodu da daxil olmaqla, 66 təşkilat və Azərbaycan Milli Ensiklopediya Elmi Mərkəzi fəaliyyət göstərir.
