Azərbaycan, Bakı, 12 noyabr /Trend, müxbir K.Zərbalıyeva/
Bakı Apelyasiya Məhkəməsinin sədri hakimlərin konkret işlər üzrə ixtisaslaşmasının tərəfdarıdır.
Bakı Apelyasiya Məhkəməsinin və Hakimlərin Seçki Komitəsinin (HSK) sədri İman Nağıyev Trend-ə müsahibəsində hakimlərin ixtisaslaşmasını yüksək qiymətləndirib.
Nağıyev bildirib ki, Azərbaycanda gələcəkdə hakimlərin ixtisaslaşmasının aparılması qanunverici orqan tərəfindən qəbul edilən normativ aktlarla tənzimlənə bilər.
HSK-nın sədri 2005-ci ildən etibarən vakant hakim vəzifələrinə namizədlərin beynəlxalq standartlara uyğun şəffaf prosedurlar əsasında seçilməsinin uğurla davam etdirildiyini deyib və yaxın gələcəkdə vakant hakim vəzifələrini tutmaq istəyən şəxslərin sənədlərinin qəbulunun həyata keçirilməsini istisna etməyib.
Məhkəmə-hüquq sistemindəki çatışmazlıqların aradan qaldırılması, mütərəqqi sistemin təşkil edilməsi istiqamətində konkret işlərin görüldüyünü deyən Nağıyevin sözlərinə görə, hakimlər işlərə baxarkən qanunvericiliklə müəyyən edilmiş normalara əsasən düzgün əməl edirlər.
"Hüquq normalarının tətbiqində müxtəlif nöqsanlara yol verildikdə isə həmin hallar yuxarı instansiya məhkəmələri tərəfindən aradan qaldırılır", - məhkəmə sədri vurğulayıb.
Trend-in arayışı: Son illərdə 120-dən çox hakim barəsində Məhkəmə-Hüquq Şurası tərəfindən intizam icraatı başlanıb. 50-dən çox hakimin fəaliyyətinə xitam verilib, 10 hakim aşağı vəzifələrə keçirilib.
Nağıyev bildirib ki, regional apelyasiya məhkəmələrinin fəaliyyətə başlaması vətəndaşların yuxarı instansiya məhkəməsinə müraciət etmələrini asanlaşdırmaqla yanaşı, hakimlərin iş yükünə və qəbul edilən qərarların keyfiyyətinə müsbət istiqamətdə təsir edib.
"Əgər apelyasiya instansiyası məhkəmələrində 2007-ci ilin iyulunadək faktiki olaraq 44 hakim fəaliyyət göstərirdisə, hazırda onların sayı 97-yə çatıb. 2010-cu ilin birinci yarısında Bakı Apelyasiya Məhkəməsinin kollegiyalarında 2452 mülki işə, 317 iqtisadi mübahisəyə, 559 cinayət işinə baxılıb", - məhkəmə sədri deyib.
Nağıyev həbs-qətimkan tədbirinin seçilməsi ilə bağlı məhkəmələrin fəaliyyətində əsaslı dönüş yarandığını bildirib.
"Ali Məhkəmənin Plenumu tərəfindən "Təqsirləndirilən şəxslər barəsində həbs qətimkan tədbirinin seçilməsi ilə bağlı təqdimatlara baxılarkən məhkəmələr tərəfindən qanunvericiliyin tətbiqi təcrübəsi haqqında" tövsiyə xarakterli qərarın qəbul edilməsindən sonra qanunun müvafiq məsələyə dair tələblərinə dürüst əməl edilməsi baxımından məhkəmələrin fəaliyyətində əsaslı dönüş yaranıb", - Nağıyev deyib.
Trend-in arayışı: Ötən ilin noyabrında Ali Məhkəmənin Plenumu qətimkan tədbirləri ilə bağlı işlərə baxarkən məhkəmələrin diqqətli olması və qərarların əsaslandırılması ilə bağlı qərar qəbul edib. Həmçinin belə pozuntulara yol verən hakimlərin intizam qaydasında cəzalandırılması ilə bağlı Məhkəmə-Hüquq Şurasına müraciət olunub.
Şuranın qərarı ilə həbs qətimkan tədbiri seçilərkən insan hüquq və azadlıqlarının qanunsuz məhdudlaşdırılmasına, prosessual pozuntulara və digər kobud nöqsanlara yol verdiklərinə görə 14 hakim barədə intizam icraatları başlanılıb.
Məhkəmə sədri bildirib ki, İnsan Hüquqları üzrə Avropa Məhkəməsinin qərarlarının hakimlər tərəfindən öyrənilməsi və istifadə edilməsi təmin edilir, presedent hüququ məhkəmə sistemində uğurla tətbiq edilir.
Azərbaycan Respublikasında məhkəmə sisteminin müasirləşdirilməsi və "Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 19 yanvar 2006-cı il tarixli fərmanında Ali Məhkəməyə və digər yuxarı instansiya məhkəmələrinə İnsan Hüquqları üzrə Avropa Məhkəməsinin presedent hüququnun öyrənilməsinin təşkil edilməsi və onun məhkəmə təcrübəsində nəzərə alınması tövsiyə edilib.
