Azərbaycan, Bakı, 10 dekabr /Trend, müxbir M.Əliyev/
Milli Məclisin Elm və təhsil komitəsinin üzvü, millət vəkili Asəf Hacıyev hesab edir ki, Azərbaycanda ucqar kənd məktəblərinin birləşdirilməsi həmin yerlərdə müəllim çatışmazlığı problemini aradan qaldıra bilər.
"Bir-birinə yaxın yerləşən kəndlərin hər birində məktəblərin fəaliyyət göstərməsi əvəzinə, onları birləşdirib şagirdləri avtobusla daşımaq daha səmərəli olardı", - Hacıyev bildirib.
Azərbaycanda gənc pedaqoji kadrların ucqar kənd məktəblərinə işləməsinin stimullaşdırılması məqsədi ilə bir sıra tədbirlər görülür. Nazirlər Kabinetinin 2010-cu ilin aprel ayında qəbul etdiyi qərara əsasən, pedaqoji profilli ali və orta ixtisas təhsili müəssisələrini bitirmiş gənc mütəxəssislərin kənd rayonlarında yerləşən ümumi təhsil müəssisələrinə işə cəlb olunmasının stimullaşdırılması və həmin müəssisələrdə pedaqoji kadr tələbatının ödənilməsi məqsədilə yerli icra hakimiyyəti orqanları tərəfindən bələdiyyələrlə birlikdə həmin müəllimlərin yaşayış sahələrinə ehtiyaclarının ödənilməsinə kömək göstərilməlidir. Bundan başqa, əmək fəaliyyətinə başlayan və 3 il müddətində bu fəaliyyəti ümumi təhsil müəssisələrində davam etdirən gənc mütəxəssislərə bu müddət ərzində kommunal xidmətlərini ödəmək üçün 40 manat məbləğində kompensasiya verilir. Qərara əsasən, 20 km-dən artıq məsafədə yerləşən ümumi təhsil müəssisələrində əmək fəaliyyətinə başlayan hər bir müəllim üçün 3 il müddətində aylıq əmək haqqına ayda 70 manat məbləğində əlavə ödənilir, yol xərci, əmlakın daşınması üçün nəqliyyat xərci və ilkin yaşayış şəraitinin yaradılması məqsədilə əmək haqqının 2 misli həcmində birdəfəlik yardım ödənilir.
Millət vəkili Hacıyev hesab edir ki, bu həm müəllim problemini həll edər, həm də təhsilin effektivliyini artıra bilər.
"Sinifdə şagirdlərin sayı 20-25-dən aşağı olanda, tədris prosesində şagirdlərin müzakirəsi alınmır. Elə kənd məktəbləri var ki, sinifdə 3-5 şagird olur", - Hacıyev bildirib.
