Azərbaycan, Bakı, 10 may /Trend, müxbir M.Əliyev/
Azərbaycanın "Meliorasiya və su təsərrüfatı" Açıq Səhmdar Cəmiyyəti Fövqəladə Hallar Nazirliyinə daşqınların və onların nəticələrinin qarşısının alınması üzrə dörd layihə təqdim edib. Trend-in məlumatına görə, bu barədə çərşənbə axşamı jurnalistlərə ASC rəhbəri Əhməd Əhmədzadə bildirib.
"Hazırda FHN-də həmin layihələrə baxılır. Onlar ümumi uzunluğu 1200 kilometr olan çayların sahillərinin bərkidilməsini, eləcə də 178 nasos stansiyasının köçürülməsini nəzərdə tutur", - o deyib.
Əhmədzadənin sözlərinə görə, bu il ölkə ərazisinə çaylar vasitəsilə ötən ildəkinə nisbətən böyük həcmdə su gətirilib. Lakin Azərbaycandakı su anbarlarının doldurulması üçün 3 milyard kubmetr sərbəst yer var, ona görə də heç bir daşqın təhlükəsi yoxdur.
Əhmədzadə bildirib ki, hazırda möhkəmləndirmə işləri, yəni 600 kilometr uzunluğunda topraq bəndlərin tikintisi aparılır.