Azərbaycan, Bakı, 5 noyabr /Trend müxbir H. Vəliyev/
IREX beynəlxalq qeyri-kommersiya təşkilatı Azərbaycanın rayonlarında internet-köşklər quraşdıracaq. Bu barədə şənbə günü Trend-ə IREX-in hüquqşünası Ələsgər Məmmədli deyib.
Onun sözlərinə görə, ilkin mərhələdə 30 internet-köşkün əsasən əhalinin sayı çox və bunun üçün münasib infrastrukturun mövcud olduğu rayon mərkəzlərində, kəndlərdə və qəsəbələrdə quraşdırılması planlaşdırılır.
"Biz artıq layihə üzrə hazırlıq işlərini başa çatdırmışıq və hazırda bu köşklərin quraşdırılacağı yerlər müəyyənləşdirilir. Bu qurğuların quraşdırılacağı yerlərdən biri poçt şöbələri olacaq. Bununla bağlı biz Azərbaycan Rabitə və İnformasiya Texnologiyaları və "Azərpoçt"la danışıqlar aparırıq. İnternet-köşklərin quraşdırılmasına ən geci 2012-ci il yanvar ayında başlanacaq", - Məmmədli deyib.
Onun sözlərinə görə, layihəyə hökumət tərəfindən dəstək vacibdir. Bununla bağlı IREX icraedici strukturlarla işə kömək üçün Nazirlər Kabinetinə müraciət edib. Layihənin dəstəklənməsi barədə danışıqlar həmçinin mobil rabitə operatorları ilə aparılıb.
"Layihəni ABŞ Beynəlxalq İnkişaf Agentliyi (USAID) maliyyələşdirir. Azərbaycanın müstəqillik əldə etməsindən bəri bu təşkilatın layihələri maliyyələşdirməsinin həcmi 300 milyon dolları ötüb" , - Məmmədli deyib.
İnternet-köşklərin özünə gəlincə, Məmmədli deyib ki, təchizatçının seçimi birbaşa onların təkliflərinin qiymətindən asılıdır. Hazırda IREX Azərbaycan kompüter avadanlıqları istehsalçısı "KUR" və "BestComp Group" şirkətinin təkliflərini nəzərdən keçirir.
İnternet-köşklərin respublikanın rayonlarında quraşdırılmasında əsas məqsəd əhali üçün informasiyaya çıxışı təqdim etməkdir ki, vətəndaşlar onlayn-ödənişlər edə, dövlət qurumlarına elektron formada müraciət edə, mövcud problemlərlə bağlı ərizə, şikayətlər verə bilsinlər.
