Azərbaycan, Bakı, 20 fevral /Trend, müxbir M.Əliyev/
Azərbaycan Mətbuat Şurası ilə Rusiya Jurnalistlər İttifaqının Novosibirsk yerli təşkilatı arasında əməkdaşlıq memorandumu imzalanıb. Trend-in məlumatına görə, bu barədə bazar ertəsi Mətbuat Şurasından bildirilib.
Sənəddə başlıca olaraq hər iki ölkə jurnalistləri arasında intensiv iş birliyinin yaradılması üçün qarşılıqlı səfərlərin təşkili, müxtəlif istiqamətlərdə təcrübə mübadiləsinin aparılması nəzərdə tutulub.
Memorandumda, həmçinin Novosibirskdə fəaliyyət göstərən kütləvi informasiya vasitələrinin nümayəndələrinin Azərbaycanla ətraflı tanışlığının təşkili məsələləri öz əksini tapıb.
Rusiyalı qonaqlarla görüşdə Azərbaycan Mətbuat Şurasının sədri Əflatun Amaşov bildirib ki, Müstəqil Dövlətlər Birliyi məkanında ilk dəfə olaraq Azərbaycanda yaradılan Mətbuat Şurası institutu medianın özünütənzimləməsini həyata keçirən orqandır.
Rusiya Jurnalistlər Birliyinin Novosibirsk vilayəti təşkilatının sədri Andrey Çelnakov isə Azərbaycan Mətbuat Şurasının medianın özünütənzimləməsi ilə bağlı təcrübəsinin təmsil olunduğu bölgə üçün də əhəmiyyətli olduğunu vurğulayıb. O, ayrı-ayrı kütləvi informasiya vasitələrində gedən materiallardakı xoşagəlməz məqamlara qarşı ictimai qınağın effektiv vasitə olduğunu bildirib.