Azərbaycan, Bakı, 13 iyul /Trend, müxbir M.Əliyev/
Azərbaycan Təhsil Nazirliyi ilə Çin Təhsil Nazirliyi arasında 2012-2015-ci illərdə təhsil sahəsində əməkdaşlığa dair saziş imzalanıb. Trend-in məlumatına görə, sazişi təhsil naziri Misir Mərdanov və Çinin ölkəmizdəki səfiri Xun Suin imzalayıblar.
Sazişdə iki ölkə arasında təhsil sahəsində əməkdaşlığın inkişaf etdirilməsi, müəllim və tələbə mübadiləsinin aparılması, ali təhsil müəssisələrinin qarşılıqlı əlaqələrinin genişləndirilməsi məsələləri nəzərdə tutulub.
Qeyd edək ki, hazırda Çin universitetlərində 31 azərbaycanlı gənc dövlət xətti ilə təhsil alır. Bu vaxtadək Çində təhsil alanların 17-si məzun olub. Çində 16 nəfər Azərbaycan tərəfinin təqaüdü hesabına təhsil alır. Hazırda isə ümumilikdə Azərbaycanda 207 nəfər Çin vətəndaşı təhsil alır.