Azərbaycan, Bakı, 12 sentyabr /Trend, müxbir İ.İsabalayeva/
Qafqaz Müsəlmanları İdarəsi Həcc ziyarətinə gedəcək şəxslərə viza alınması üçün onların sənədlərini müvafiq qurumlara təqdim edib.
İdarənin Beynəlxalq əlaqələr şöbəsinin müdiri Müqəddəs Payızov çərşənbə günü Trend-ə bildirib ki, zəvvarlar oktyabrın 14-dən başlayaraq 7 gün ərzində hər gün iki təyyarə ilə yola salınacaqlar. Ziyarətə gedənlər 18 gündən sonra geri qayıtmağa başlayacaqlar. Bu il Həcc ziyarətinə təxminən 2400-2500 zəvvar gedəcək.
Payızov artıq Həcc ziyarəti üçün Səudiyyə Ərəbistanı hökuməti tərəfindən Azərbaycan üçün ayrılmış kvotanın dolduğunu bildirib.
O qeyd edib ki, ziyarətə hazırlıqla bağlı heç bir problem yoxdur.
İdarə rəsmisi ziyarətə getmək istəyənlər üçün müəyyən edilmiş qiymətlərin 3090 və 3850 manat olduğunu da xatırladıb.