Azərbaycan, Bakı, 8 noyabr /Trend/
Bolqarıstanın ən nüfuzlu jurnallarından biri olan "Avropa" jurnalında "Şuşa - Azərbaycan Qarabağının ürəyidir" başlığı altında məqalə dərc olunub.
Azərbaycanın Bolqarıstandakı səfirliyindən Trend-ə verilən məlumata görə, məqalədə Dağlıq Qarabağ bölgəsinin tarixən Azərbaycana məxsus olduğu bildirilib, 1752-ci ildə Qarabağ xanlığının paytaxtı olan Şuşa qala şəhərinin yaradıldığı və Şuşa şəhərinin Azərbaycan şəhərlərindən biri olduğu qeyd edilib. Şuşa şəhərinin o dövrlərdə mədəniyyətin, ədəbiyyatın, musiqinin və memarlığın mərkəzi hesab olunduğu və Şuşa şəhərinin Azərbaycan muğamının vətəni olduğu vurğulanıb.
Bununla yanaşı, məqalədə 1988-ci ildə SSRİ rəhbərliyinin dəstəyi ilə erməni separatçı birləşmələri tərəfindən Azərbaycanın ərazisi olan Dağlıq Qarabağ bölgəsindən azərbaycanlıların məcburi qovulmalarının başlanıldığı, Dağlıq Qarabağ daxil olmaqla Azərbaycan torpaqlarının 20%-nin işğal olunduğu, ermənilərin Azərbaycanın işğal olunmuş torpaqlarından dərhal qeyd-şərtsiz azad edilməsi ilə bağlı BMT və digər beynəlxalq təşkilatlar tərəfindən çox saylı qətnamələrin qəbul edilməsinə baxmayaraq, Ermənistan dövləti tərəfindən indiyədək bu qətnamələrə məhəl qoyulmadığı qeyd olunub.
