Azərbaycan, Bakı, 21 iyun /Trend, müxbir İ.İsabalayeva/
Sabah səhər Azərbaycanın qərb rayonlarından başlayaraq, yağışın tədricən kəsiləcəyi, gündüz əsasən yağmursuz keçəcəyi gözlənilir.
Ekologiya və Təbii Sərvətlər Nazirliyindən Trend-ə verilən məlumata görə, Bakıda və Abşeron yarımadasında iyunun 21-dən 22-nə keçən gecə bəzi yerlərdə qısamüddətli yağış yağacağı, səhər kəsiləcəyi, gündüz dəyişkən buludlu olacağı gözlənilir. Şimal-qərb küləyi səhər saatlarından başlayaraq zəifləyəcək, gündüz mülayim cənub-şərq küləyi ilə əvəz olunacaq.
Havanın temperaturunun gecə 17-22, gündüz 24-28 dərəcə isti olacağı gözlənilir.
Abşeron çimərliklərində dəniz suyunun temperaturu Sumqayıt, Novxanı, Pirşağı, Nardaran, Bilgəhdə 20-21, Zaqulba, Buzovna, Mərdəkan, Şüvəlanda 21-22, Türkan, Hövsan, Şıx, Sahildə 22-23 dərəcə isti təşkil edəcək.
Azərbaycanın rayonlarında iyunun 22-də gecə bəzi yerlərdə şimşək çaxacağı, yağış yağacağı, səhər qərb rayonlarından başlayaraq tədricən kəsiləcəyi, gündüz əsasən yağmursuz keçəcəyi gözlənilir. Qərb küləyi əsəcək.
Havanın temperaturunun gecə 17-21, gündüz 30-35, dağlarda gecə 6-11, gündüz 18-23 dərəcə isti olacağı gözlənilir .
Yaxın 2-3 gün ərzində respublikanın rayonlarında isti temperatur rejimi və bəzi rayonlarda küləyin arabir güclənməsi, şimşəkli, yağışlı hava şəraiti yenə də payızlıq dənli əkinlərində məhsul yığımını bir qədər çətinləşdirəcək. Lakin digər kənd təsərrüfatı bitkilərinin inkişafı və boy atması, həmçinin tarlalarda və bağlarda aqrotexniki işlərin aparılması üçün əlverişli olacaq.