...

"Əli və Nino" filminin çəkilişləri ilə əlaqədar İçərişəhərdə avtomobillərin hərəkəti məhdudlaşdırılacaq

Cəmiyyət Materials 2 Mart 2015 10:52 (UTC +04:00)
Bakı şəhərində Qurban Səidin eyniadlı əsəri əsasında ekranlaşdırılan “Əli və Nino” filminin çəkilişləri başlayıb.
"Əli və Nino" filminin çəkilişləri ilə əlaqədar İçərişəhərdə avtomobillərin hərəkəti məhdudlaşdırılacaq

Azərbaycan, Bakı, 2 mart /Trend/

Bakı şəhərində Qurban Səidin eyniadlı əsəri əsasında ekranlaşdırılan "Əli və Nino" filminin çəkilişləri başlayıb. Film çəkilişlərinin bir hissəsinin cari ilin mart-aprel aylarında İçərişəhərdə keçirilməsi planlaşdırılır.

"İçərişəhər" Dövlət Tarix-Memarlıq Qoruğu İdarəsindən Trend-ə verilən məlumata görə, filmin çəkilişləri ilə əlaqədar mart ayının 2-dən 14-ü tarixə qədər İçərişəhərə avtomobillərin girişi və hərəkəti müvəqqəti olaraq məhdudlaşdırılacaq. Mart ayının 4-dən İçərişəhərin Qoşa Qala Qapısı girişindən nəqliyyatın hərəkəti tamamilə dayandırılacaq, Neftçilər prospekti tərəfindən olan girişdən isə giriş-çıxış yalnız İçərişəhərin sakinləri və elektron kart sahibi olan digər rezidentlər üçün açıq olacaqdır.

Çəkilişlər əsasən İçərişəhərdə yerləşən Şirvanşahlar Saray Kompleksində, Qoşa Qala Qapısı meydanında və Asəf Zeynallı küçəsində aparılacaqdır. Əsərdə dövrlə bağlı obraz və hadisələri dolğun canlandırmaq üçün həmin məkanlarda XIX əsrin sonu və XX əsrin əvvəllindəki Bakı mühitinə uyğun dekorasiyalar qurulacaq.

Çəkilişlərlə əlaqədar İçərişəhərin sakinləri və qonaqları üçün yarana biləcək müvəqqəti narahatçılığın minimuma endirilməsi məqsədi ilə "İçərişəhər" Dövlət Tarix-Memarlıq Qoruğu İdarəsi tərəfindən bütün lazımi tədbirlər görüləcəkdir.

Məqalədə:
Xəbər lenti

Xəbər lenti