Azərbaycan, Bakı, 9 aprel /Trend/
Cari ilin mart ayında ölkəmizdə ünvanlı sosial yardım alan ailələrin sayında azalma müşahidə olunub.
Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsindən Trend-ə verilən məlumata görə, ölkədə əhalinin gəlirlərində mütəmadi artım dinamikası və sosial rifah halının getdikcə yüksəlməsi, habelə ünvanlı dövlət sosial yardımı proqramının icrasında ünvanlılıq və şəffaflıq prinsiplərinin təminatına nəzarətin artırılması ünvanlı yardım təyin olunan ailələrin sayının azalması ilə müşahidə olunur.
2015-ci ilin mart ayında respublikada 111391 ailə (485927 nəfər ailə üzvü) ünvanlı dövlət sosial yardımı alıb ki, bu da 2014-cü ilin müvafiq dövrü ilə müqayisədə 32437 ailə (141348 nəfər ailə üzvü) və ya 22,5 % azdır. Bu azalma digər tərəfdən ünvanlı sosial yardımların bir ailəyə düşən orta aylıq artması ilə müşaiyət edilib. Belə ki, cari ilin mart ayında ünvanlı dövlət sosial yardımının bir ailəyə düşən orta aylıq məbləği 2014-cü ilin müvafiq dövrü ilə müqayisədə 16,97 manat (13,5 %) artaraq 143,13 manata çatıb.
Ünvanlı sosial yardım alan ailələrdə yaşı 18-dək ailə üzvlərinin sayı 230716 nəfər, onlardan 1 yaşadək ailə üzvlərinin sayı 6334 nəfər, sağlamlıq imkanları məhdud 18 yaşadək ailə üzvlərinin sayı isə 5447 nəfərdir. Bu yardımın təyin olunduğu ailələrin 31997-i tərkibində 3 və daha çox uşağı olanlardır.
Hazırda Azərbaycan Prezidenti İlham Əliyevin 23 fevral 2015-ci il tarixli Fərmanına əsasən, ƏƏSMN tərəfindən ünvanlı dövlət sosial yardımı sisteminin tam avtomatlaşdırılması üçün elektron əsaslar üzərində texniki infrastrukturun hazırlanması işləri aparılır. Azərbaycana məxsus bu yeni sistemin tətbiqi vətəndaşlara fərdi kommunikasiya vasitələri və ya poçt şöbələrində xüsusi olaraq quraşdırılacaq infoköşklərdən ünvanlı sosial yardım üçün elektron formada müraciət etmək imkanı yaradacaq. Vətəndaşların bu yardımı almaq hüquqlarına baxılması üçün lazımi arayış və məlumatlar isə müvafiq dövlət qurumlarının informasiya resurslarından elektron formada əldə edilməklə, yardım təyinatı tam avtomatlaşmış sistem əsasında aparılacaq. Bu isə ünvanlı sosial yardım təyinatında məmur-vətəndaş təmaslarının aradan qaldırılmasına, aztəminatlı ailələrin ünvanlı sosial yardım sistemi üzrə sürətli, rahat və şəffaf xidmətlərə çıxışına imkan verəcək.
Qeyd edək ki, dövlət başçısının ötən ay imzaladığı müvafiq Sərəncama əsasən, ölkəmizdə aztəminatlı ailələr üçün nəzərdə tutulan ünvanlı dövlət sosial yardımlarının təyinat müddəti də bir ildən iki ilədək uzadılıb ki, bu da əksəriyyəti təkrar olaraq ünvanlı yardım alan ailələrin hər il yenidən sənəd toplayaraq təqdim etmək çətinliyindən azad olmasına, bu yardımların təyinatında vətəndaş-məmur təmaslarının xeyli azalmasına yönəlib.