Azərbaycan, Bakı, 1 oktyabr /Trend, müxbir Elmir Murad/
Oktyabrın 3-də növbəti dəfə SAT imtahanı keçiriləcək.
Tələbə Qəbulu üzrə Dövlət Komissiyasından (TQDK) Trend-ə verilən məlumata görə, imtahan saat 08:30-da TQDK-nın Yasamal rayonu, Mikayıl Müşfiq küçəsi, 1m ünvanında yerləşən inzibati binasında keçiriləcək. İmtahanın müddəti 3 saat 45 dəqiqədir (fasiləsiz).
İmtahanda iştirak edəcək şəxslər saat 07:45-dən gec olmayaraq imtahan binasında olmalıdırlar və imtahana gecikən şəxslər imtahan zalına buraxılmayacaqlar.
Nəticələr oktyabrın 22-də imtahanda iştirak edənlərin "College Board"-un internet səhifəsindəki şəxsi hesabında açıqlanacaq.
Qeyd edək ki, SAT (Scholastic Aptitude Test - Akademik Qiymətləndirmə Testi) Azərbaycanda şagirdlərin oxuma, yazma və riyazi biliklərini yoxlayan standartlaşdırılmış beynəlxalq test imtahanıdır.