Bakı. Trend:
Dünyanın tanınmış akademik nəşriyyatlarından olan "Elsevier" əməkdaşlıq etdiyi Azərbaycan Respublikasının Prezidenti yanında Elmin İnkişaf Fondu ilə birlikdə ilk dəfə olaraq "SCOPUS Mükafatları"nı təqdim etmək məqsədilə tədbir və qala gecə keçirib.
Bakı Dövlət Universitetinin (BDU) Mətbuat və informasiya şöbəsindən Trend-ə verilən məlumata görə, Azərbaycan Respublikasının Prezidenti yanında Elmin İnkişafı Fondunun icraçı direktoru Elçin Babayev təqdimatların əhəmiyyətindən söz açıb, ölkəmizdə elmin inkişafına dövlət tərəfindən göstərilən qayğını xüsusi vurğulayıb. Qeyd olunub ki, "SCOPUS Mükafatı Azərbaycan-2016" iki istiqamət (Araşdırmalar və Elmi Jurnal üzrə Yüksək Müvəffəqiyyət Mükafatları) olmaqla bir neçə nominasiya üzrə nəzərdə tutulub.
Tədbirdə Azərbaycanda fəaliyyət göstərən, yüksək nəticələri ilə ölkə hüdudlarından kənarda tanınmış 4 elmi tədqiqat qurumuna, eləcə də Bakı Dövlət Universitetinə mükafat təqdim olunub. BDU-da nəşr olunan "Tətbiqi və hesablama riyaziyyatı (Applied and computational mathematics)" jurnalı da mükafata layiq görülüb. Bakı Dövlət Universitetnə verilən mükafat BDU-nun rektoru, akademik Abel Məhərrəmova, "Tətbiqi və hesablama riyaziyyatı" jurnalına verilən mükafat isə jurnalın redaktoru akademik Fikrət Əliyevə təqdim olunub.