...

Nazirlik arıçılara müraciət edib

Cəmiyyət Materials 9 İyun 2017 09:45
Yaz fəslinin gəlişi ilə ölkənin arıçılıq təsərrüfatlarında bal arılarının (Apis mellifera L.) yetişdirilməsi, çoxaldılması, arıçılıq məhsullarının istehsalı və emalı üzrə fəaliyyət aktivləşir.
Nazirlik arıçılara müraciət edib

Trend-i buradan izləyin

Bakı. Trend:

Yaz fəslinin gəlişi ilə ölkənin arıçılıq təsərrüfatlarında bal arılarının (Apis mellifera L.) yetişdirilməsi, çoxaldılması, arıçılıq məhsullarının istehsalı və emalı üzrə fəaliyyət aktivləşir. Bununla əlaqədar vətəndaşlar tərəfindən arı ailələrinin yaşadığı qutuların meşə ərazilərində yerləşdirilməsi ilə bağlı çoxsaylı müraciətlər edilir.

Ekologiya və Təbii Sərvətlər Nazirliyindən (ETSN) Trend-ə verilən məlumata görə, arıçılığın ənənəvi kənd təsərrüfatı sahəsi olmasını, arıçılıq fəaliyyətinin entomofil bitkilərin tozlandırılmasında əvəzsiz əhəmiyyətini nəzərə alaraq ETSN arıçı fermerlərə müraciət edərək bildirir ki, Nazirliyin istifadəsində olan bütün növ kateqoriyalı meşə ilə örtülü ərazilərə arı ailələrinin heç bir ödəniş olunmadan, müvafiq qaydada qeydiyyatdan keçmək yolu ilə yerləşdirilməsinə icazə verilir.

Bildiririk ki, ETSN rəhbərliyinin regionlarda əhali ilə keçirilən görüşlərində də vətəndaşlar tərəfindən belə müraciətlər edilir və arıçılıqla məşğul olan fermerlərə meşə sahələrindən bu məqsədlə istifadə üçün müvafiq tövsiyələr verilir.

Çiçəkləmə dövründə arıçı meşə və ekologiya idarələri ilə razılaşdıraraq müəyyən olunmuş ərazilərdə arı qutularını yerləşdirə və özü də onların yanında qala bilər (həmin şəxslərin əksəriyyəti meşəyə öz mal-qarasını da gətirmək istəyir, bu isə meşə üçün ziyanlı olduğuna görə qadağandır). Arıların meşədə saxlanılması, təkcə arılar üçün deyil, həm də meşə bitkiləri üçün, otlaqlar üçün yaxşıdır və bu, ikitərəfli faydalıdır.

ETSN arı ailələrinin yerləşdirilməsi ilə bağlı hər hansı problem yaranarsa, yerli meşə idarələrinə və Nazirliyin 168 nömrəli “Qaynar Xətt” xidmətinə məlumat verilməsini xahiş edir.

Nazirolik bildirir ki, bəzi işbazlar nazirlik tərəfindən arıçılara verilən bu hüquqlardan sui-istifadə edir, öz maraqları üçün yanlış məlumatlar yayır, məsələni özlərinin qazanc mənbəyinə çevirməyə cəhd edirlər.

ETSN olaraq arıçılıqla məşğul olan fermerlərə bir daha müraciət edirik ki, arı qutularının meşə ərazilərində yerləşdirilməsi ödənişsizdir və arılarını müəyyən olunmuş ərazilərdə bəsləyə bilərlər. Bununla bağlı hər hansı anlaşılmazlıq yarandığı təqdirdə, bilavasitə yerli meşə idarələrinə və Nazirliyə məlumat versinlər.

Məqalədə:
Xəbər lenti

Xəbər lenti