Ağdam. Trend:
Bütün dünya tarixində milli azadlığını qoruyan 20 Yanvar şəhidlərimizin adı əbədiləşdirilib və bu gün də anılır.
Bunu Trend-ə bu gün 20 Yanvar faciəsi ilə əlaqədar Ağdamdakı Şəhidlər xiyabanını ziyarət edərkən Ağdam Dövlət Peşə Mərkəzinin direktoru Xanım Əliyeva açıqlamasında deyib.
"Bu gün bütün Azərbaycan xalqının qan yaddaşına həsr olunmuş günlərdən biridir. 1990-ci il yanvarın 19-dan 20-nə keçən gecə rus qoşununun Bakı şəhərində törətdiyi qırğından 35 il keçir. Həmin o gecədə vətəndaşlarımız öz azadlığını və milli kimliyini qorumaq uğrunda apardığı mübarizə tarixə yazılıb. Allahdan bütün şəhidlərimizə rəhmət, qazilərimizə isə şəfa diləyirəm", - direktor bildirib.
Qeyd edək ki, bu gün Azərbaycanda 20 Yanvar faciəsinin 35-ci ildönümüdür.
Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 1990-cı il yanvarın 20-də ölkəmizə qarşı ərazi iddiaları irəli sürən Ermənistanın təcavüzkar hərəkətlərindən və keçmiş SSRİ rəhbərliyinin onlara havadarlığından hiddətlənən, Bakının küçələrinə və meydanlarına çıxaraq buna öz qəti etirazını bildirən geniş xalq kütlələrinə qarşı Sovet ordusunun döyüş hissələrinin yeridilməsi Azərbaycanda misli görünməmiş faciəyə gətirib çıxardı.
Həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucaldılar.