Futbol üzrə Azərbaycan yığması sentyabrın 12-də Uelsə qarşı 2006-cı il dünya çempionatının sonuncu seçmə matçını keçirmək üçün Kardiffə yola düşüb.
Komandanın baş məşqçisi Vaqif Sadıqovun Trend ə xəbər verdiyi kimi, matçın başlanmasına qədər qalan günlər ərzində futbolçular Kardiffdə iki təlim oyunları keçirəcək. Onlardan biri "Millenium" stadionunda olacaq. "Oyun məhz bu meydanda keçiriləcək, buna görə də cədvələ əsasən, biz görüş ərəfəsində onu öyrənəcəyik", - deyə mütəxəssis qeyd edib.
Xatırladaq ki, kollektivin tərkibi heç də optimal səviyyədə deyil. Belə ki, müxtəlif səbəblərlə əlaqədar V.Sadıqov hücumçu Qurban Qurbanovun, yarımmüdafiəçi Anatoli Ponomaryovun, müdafiəçilər Aftandil Hacıyevin, Emin Quliyevin və Kamal Quliyevin xidmətlərindən yararlana bilməyəcək.
