Mayın 3-də Bakıda "Azərbaycanda inzibati hüquq islahatı" mövzusunda beynəlxalq konfrans keçirilib. Bu barədə Trend ə Almaniya Texniki Əməkdaşlıq Cəmiyyətinin (GTZ) "Azərbaycanda məhkəmə və hüquq islahatlarının dəstəklənməsi" layihəsinin əməkdaşı Müşfiq Məmmədov məlumat verib.
Konfrans "Azərbaycanda məhkəmə və hüquq islahatlarının dəstəklənməsi" layihəsi çərçivəsində keçirilib. Tədbirdə 2007-ci ilin yanvar ayında qüvvəyə minəcək "İnzibati icraat haqqında" Azərbaycan Respublikası Qanununun təqdimatı olub.
Konfransın işində Milli Məclisin, nazirliklərin nümaynədələri, o cümlədən Almaniyanın, İsveçrənin, Niderlandın və digər ölkələrin nümayəndələri də iştirak ediblər.
Milli Məclis (MM) Aparatının rəhbəri Səfa Mirzəyev inzibati hüquq islahatının Azərbaycan üçün əhəmiyyəti, hüquq islahatının hazırkı durumu və perspektivləri barədə danışıb. Daha sonra almaniyalı, isveçrəli, niderlandlı nümayəndələr də eyni mövzu ətrafında çıxış ediblər.
Tədbirdə bir sıra nazir müavinləri də iştirak ediblər.
