Azərbaycanın ədliyyə naziri Fikrət Məmmədov penitensiar sistemdə yeni ictimai nəzarətin yaradılması ilə bağlı sənəd imzalayıb. Bu barədə Trend ə Ədliyyə Nazirliyi Məhkəmə Qərarlarının İcrası Baş İdarəsinin (MQİBİ) qərargah rəisi Musa Hümbətov məlumat verib.
"Məhkəmə Qərarlarının İcrası Baş İdarəsinin (MQİBİ) rəisi Aydın Qasımov vəzifədən kənarlaşdırılandan sonra MQİBİ yanında Penitensiar Sistemə İctimai Nəzarət Şurası da fəaliyyətini dayandırıb. Məhkəmə Qərarlarının İcrası Baş İdarəsində baş vermiş məlum kadr dəyişiklikləri zamanı ədliyyə naziri Fikrət Məmmədovun təşəbbüsü ilə toplantı keçirilmişdi və təklif olunmuşdu ki, İctimai Şuranın tərkifi yenidən formalaşsın. Artıq nazir belə bir qurumun yaradılmasına dair sənəd imzalayıb. Lakin bu dəfə qurum "ictimai şura" deyil, "ictimai komitə" adlandırılıb" - deyə M.Hümbətov bildirib.
Qərargah rəisinin sözlərinə görə, İctimai Komitəyə QHT-lərin 11 nümayəndəsi daxil edilib. "İctimai Komitə öz işini bu QHT-lərin təklifləri əsasında quracaq" - deyə M.Hümbətov qeyd edib.