Naxçıvan MR Babək rayonu Naxçıvançay ərazisində qanunsuz ov edən 2 nəfər saxlanılıb. Trend in Naxçıvan Bürosu xəbəri Babək rayon Polis Şöbəsinin məlumatına istinadən verir.
Saxlanılanlar Naxçıvan şəhər sakinləri İbrahim Həsənov və İlqar Əliyev olub. Hər iki şəxs barəsində rayon polis şöbəsində inzibati qaydada protokol tərtib edilib. Saxlanılan şəxslərdən həmçinin ov silahları müsadirə edilib. Naxçıvan MR Ekologiya və Təbii Sərvətlər Nazirliyindən Trend ə faktı təsdiq edərək bildiriblər ki, iş onlara təqdim edilib və saxlanılan şəxslər qanuna müvafiq cərimə ediliblər.
Qeyd edək ki, Naxçıvan MR ərazisində istənilən ərazidə ov etmək qadağan hesab olunur. Regionda ekoloji tarazlığın bərpası, fauna ehtiyatlarının artırılması istiqamətində Naxçıvan MR Ali Məclisi sədri Vasif Talıbovun imzaladığı sərəncama əsasən 2001-ci ildən ov mövsümü qapalı elan edilib.
