Azərbaycan, Bakı /müxbir Trend E.Cavadova/"Monitor" jurnalının mərhum baş redaktoru Elmar Hüseynovun ölümünün 2-ci ildönümü ilə əlaqədar bu gün martın 2-də Beynəlxalq Mətbuat Mərkəzində "Elmar Hüseynov Fondu" və Redaktorlar Birliyinin təşkilatçılığı ilə toplantı keçirilib. Toplantıda siyasi partiyaların, media orqanlarının, qeyri-hökumət təşkilatlarının, jurnalist qurumlarının rəhbərləri, ABŞ-ın Azərbaycandakı səfiri və digər qonaqlar iştirak ediblər.
Elmar Hüseynovun ruhu bir dəqiqəlik sükutla yad edilib. Sonra "Qanun" jurnalının baş redaktoru Şahbaz Xuduoğlu E.Hüseynovun 2 il əvvəl yaşadığı evin qarşısında qətlə yetirilməsindən, hadisə ilə bağlı cinayət işinin açılması və istintaqın hələ də davam etməsi barədə danışıb. "Azadlıq" blokunun həmsədrləri - Lalə Şövkət, Əli Kərimli, Sərdar Cəlaloğlu, Müsavat Partiyasının başqanı İsa Qəmbər, millət vəkili Pənah Hüseyn, "Azadlıq" qəzetinin baş redaktoru Qənimət Zahid və başqaları çıxış edərək E.Hüseynovun qətlə yetirilməsini pisləyib, cinayətkarların hələ də tapılmamasından narahatlıqlarını bildiriblər. Çıxışlarda qatil və sifarişçilərin tapılıb cəzalandırılması tələbi səsləndirilib.
ABŞ səfiri Enn Dersi çıxışında qeyd edib ki, E.Hüseynov kimi jurnalistlərə hücumlar demokratiyaya edilən hücumdur və qatillər mütləq tapılıb cəzalandırılmalıdır: "Qatillər bir adamı öldürməyə nail oldular, lakin ideyanı boğa bilmədilər, Elmar Hüseynov Azərbaycanda demokratiyanın qorxmaz mühafizəçisi idi. Mən Azərbaycan rəhbərliyini səylərini artırmağa və ədalətin öz yerini tapmasını təmin etməyə çağırıram", deyə səfir vurğulayıb.
Toplantıda E.Hüseynovla bağlı rolik nümayiş etdirilib. Həmçinin E.Hüseynovun 1996-98-ci illərdə "Monitor" jurnalında çap edilmiş yazılarından ibarət "Poka qorit sveça" adlı kitabının təqdimatı olub. Ş.Xuduoğlu bildirib ki, bu, E.Hüseynovun yazılarından ibarət birinci topludur və ikinci cild də çapa hazırlanır.