...

"Barmek" əməkdaşlarının işi üzrə məhkəmə iclası davam etdirilir

Cəmiyyət Materials 2 Aprel 2007 17:14 (UTC +04:00)

Azərbaycan, Bakı / Trend müxbir K. Zərbalıyeva/Ağır Cinayətlərə Dair İşlər Üzrə Məhkəmədə bu gün hakim Sədrəddin Hacıyevin sədrliyi ilə"Barmek Azərbaycan Elektrik Şəbəkəsi" MMC-nin prezidenti Hüseyn Arabul və şirkətin daha 7 əməkdaşı barəsindəki cinayət işi üzrə hazırlıq iclası keçirilib.

İclasda təqsirləndirilənlərin vəkilləri cinayət işinə xitam verilməsi, təqsirləndirilənlərin həbsdən azad olunması, qanunsuz qərar qəbul etmiş müstəntiqlərin cinayət məsuliyyətinə cəlb olunması barədə vəsatətlər verilib. Vəsatətlərin müzakirəsi aprelin 6-da davam edəcək hazırlıq iclasında aparılacaq.

İstintaqla müəyyən edilib ki, "Barmek" MMC-nin əməkdaşları tərəfindən elektrik enerjisini istifadəyə görə istehlakçılardan toplanmış külli miqdarda pul- 9 milyon 143 min 940 AZN dəyərində özgə əmlakı mənimsəmə və ya israf etmə yolu ilə talan edilib.

Şirkətin prezidenti Hüseyn Arabula Cinayət Məcəlləsinin 179.3.2 (mənimsəmə və ya israf etmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham elan olunub və barəsində başqa yerə getməmək haqqında iltizam qəti-imkan tədbiri seçilib.

"Barmek"in əməkdaşları, vitse-prezident Ömər Günər İsmayıl, texniki departamentin direktoru Vəfa Ağayev, texniki əməliyyat departamentinin direktor əvəzi Mahir Novruzov, sabiq baş menecer Çingiz İbadov və maliyyə departamentinin rəisi Valeh Zeynalov, yüksək gərginlikli elektrik şəbəkələrinin istismarı idarəsinin rəisi Çingiz Abdullayev, rele mühafizə xidmətinin rəisi Əsgər Əsgərzadə CM-nin 179.3.2, 308.2 və 313-cü maddələri ilə təqsirləndirilən şəxs qismində cəlb edilərək barələrində həbs və digər qəti-imkan tədbirləri seçilib.

Xəbər lenti

Xəbər lenti