Azərbaycan, Bakı / Trend müxbir K Zərbalıyeva / Məhkəmə-Hüquq Şurası 75 hakim barəsində intizam icraatı başlayıb. Məhkəmə-Hüquq Şurasından çərşənbə günü Trend ə bildirilib ki, indiyədək 50 hakim intizam məsuliyyətinə cəlb olunub. Onlar barəsində müxtəlif intizam tədbiri görülüb.
Şuranın sonuncu iclasında qanunvericiliyin tələblərini, o cümlədən mülkiyyət hüquqlarını pozduqlarına, işlərə süründürməçiliklə baxdıqlarına vətəndaşları əsassız get-gələ saldıqlarına görə Apellyasiya Məhkəməsinin hakimləri Maisə Hüseynova, Rasim İsgəndərov, Lətif Nəbiyev, Salman Hüseynov, Səbayel rayon məhkəməsinin hakimi Alim Namazov və Füzuli-Qubadlı hərbi məhkəməsinin hakimi Elnur Cəbiyev cəzalandırılıb.
Bakı şəhərinin rayon məhkəmələrinin 5 hakimi barədə isə intizam icraatı başlanılıb.
Şuradan bildirilib ki, hakimlərin fəaliyyətlərinin qiymətləndirilməsi prosesi də artıq yekunlaşıb. Qiymətləndirmənin nəticələri ölkə başçısına təqdim olunub. Yeni təyinat zamanı fəaliyyəti mənfi qiymətləndirilmiş hakimlərin fəaliyyətinə xitam veriləcək.
