Azərbaycan, Bərdə / Trend müxbir Ş.Cəliloğlu/ Azərbaycanın Yevlax rayonunda çərşənbə axşamı ilk sutəmizləyici qurğu istifadəyə verilib. Tədbirdə çıxış edən ekologiya və təbii sərvətlər naziri Hüseynqulu Bağırov bildirib ki, rayonun Ərəş kəndində yeni quraşdırılan sutəmizləyici qurğu Azərbaycan prezidentinin şəxsi vəsaiti hesabına tikilib. Nazirin sözlərinə görə, qurğuda suyun təmizlənməsi üçün iki ilə bəs edəcək filtirlər də olacaq. İki ildən sonra suyun təmizlənməsi prosesinə bələdiyyələr nəzarət edəcək. Nazir Yexlaxda yaxın vaxtlarda daha bir neçə sutəmizləyici qurğunun istifadəyə veriləcəyini deyib.
Daha sonra Bağırov həmin qurğu vasitəsilə tikilən altı içməli su bulağının açılışında da iştirak edib.
Ekologiya və Təbii Sərvətlər Nazirliyindən isə bildiriblər ki, bu qurğu vasitəsilə saatda beş-altı kub suyu təmizləmək mümkün olacaq.
Azərbaycanın Yevlax rayonu paytaxt Bakıdan 300 kilometr qərbdə yerləşir.
