Azərbaycan, Bakı / Trend müxbir K.Zərbalıyeva/ Azərbaycan Respublikasının Prezidenti yanında Dövlət Qulluğu Məsələləri üzrə Komissiya dövlət qulluqçularının fəaliyyətinin qiymətləndirilməsi qaydalarını hazırlayacaq. Bu barədə cümə axşamı Trend in sualına cavab olaraq Komissiyanın rəhbəri Bəhram Xəlilov məlumat verib. Komissiya rəhbərinin sözlərinə görə, "Dövlət qulluğu haqqında" qanuna əlavələr qüvvəyə minəndən sonra bu istiqamətdə iş başlayıb. Qaydalar hazırlanandan sonra təqdim olunacaq.
Əlavələrə görə, inzibati vəzifə tutan dövlət qulluqçusunun xidməti fəaliyyəti hər təqvim ilinin sonunda qiymətləndiriləcək. Xəlilov bildirib ki, bundan əvvəl dövlət qulluqçuları attestasiyadan keçirilirdi: "Əvvəlki qaydalara görə, dövlət qulluqçuları 5 ildən bir attestasiyadan keçirilirdi. Biz dünya təcrübəsinə uyğun olaraq tədricən qiymətləndirmə sisteminə keçəcəyik. Bundan sonra dövlət qulluqçularının fəaliyyəti hər il qiymətləndiriləcək".
"Dövlət qulluğu haqqında" qanuna edilən sonuncu əlavələrə görə, dövlət qulluqçusunun xidməti fəaliyyətinin qiymətləndirilməsində məqsəd onun il ərzində vəzifəsinin öhdəsindən gəlməsini, tutduğu vəzifəyə dair tələblərin yerinə yetirilməsini qiymətləndirməkdən və işçinin gələcək inkişafını müəyyən etməkdən ibarətdir. Xidməti fəaliyyətin qiymətləndirilməsinin nəticələri dövlət qulluqçusunun attestasiyası zamanı nəzərə alınır. Dövlət qulluqçusunun fəaliyyətinin qiymətləndirilməsi onun bilavasitə rəhbəri tərəfindən həyata keçirilir. Dövlət qulluqçusunun xidməti fəaliyyəti "əla", "yaxşı", "kafi" və "qeyri-kafi" qiymətləndirilir.