Azərbaycan, Bakı, 15 may /Trend/
Mayın 19-da Bakıda Beynəlxalq Futbol Könüllülüyü Forumu keçiriləcək.
Trend AFFA-ya istinadən məlumat verir ki, məşhur italiyalı futbolçu, "Yuventus", "Milan", "Barselona" klublarında çıxış etmiş, İtaliya millisinin heyətində 2000-ci ildə Hollandiya və Belçikada keçirilmiş Avropa çempionatında gümüş medal qazanmış, 2006-cı ildə isə Almaniyada təşkil olunmuş dünya çempionatının qalibi olmuş Canluka Zambrotta forumda forumun səfiri kimi iştirak edəcək.
Qeyd edək ki, Forumda 8 ölkədən 9 beynəlxalq səviyyəli spiker çıxış edəcək. Spikerlərin mövzusu müxtəlif dövrlərdə keçirilmiş tədbir və layihələrdən qazanılmış təcrübələrdir. İştirakçı qismində azərbaycanlı könüllülərlə yanaşı, forumda Polşa, Çin və Türkiyədən də könüllülər iştirak edəcəklər.
Forum barədə yenilikləri www.ifvf2014.com saytından izləmək mümkündür.